Олон улсын олимпийн эв санааны нэгдэл, МҮОХ хамтран “Лондон-2012” олимпийн наадамд зориулсан “Тамирчны хөтөлбөр” хэрэгжүүлж байгаагаа албан ёсоор зарлалаа. Хөтөлбөрт зургаан спортын төрлийн 11 тамирчин хамрагдаж байгаа бөгөөд олимпийн наадам хүртэл тусгай тэтгэлэг хүртэх юм. МҮОХ “Тамирчны хөтөлбөр”-ийг 2000 оноос хэрэгжүүлж эхэлсэн бөгөөд хамгийн сүүлд Бээжингийн олимпийн наадамд найман тамирчин хамрагдсан. Эдгээр тамирчин бүгд эрхээ авснаар барахгүй Э.Бадар-Ууган алт, О.Гүндэгмаа мөнгөн медаль хүртсэн билээ. ОУОХ үүнийг хамгийн сайн хэрэгжсэн хөтөлбөрийн нэгээр тодруулж байв. Уг арга хэмжээнд хамрагдсан тамирчин, холбоодын удирдлага, шигшээ багийн дасгалжуулагч тэтгэлгийн дээжээс хүртлээ.