
“Эрдэнэт үйлдвэр”-т ажилладаг байсан Д ажлын бус цагаар явж байгаад нас барсныг ар гэрийнхэн нь задлан шинжилгээнд оруулалгүй хөдөөлүүлжээ. Гэвч ажил явдлаас хойш нэг сарын дараа уг үйлдвэр мэргэжлээс шалтгаалсан өвчний улмаас нас барсан ажилтны ар гэрт нөхөн олговор олгодгийг санаж, ар гэрийнхэн нь нөхөн олговор авахаар хөөцөлдсөн байна. Нөхөн олговор авахад талийгаачийг мэргэжлээс шалтгаалсан өвчний улмаас нас барсныг нотлох баримт, баталгаа шаардлагатай байсан тул Орхон аймгийн Мэргэжлийн хяналын газрын эмчилгээ, оношлогоо, чанарын хяналтын улсын байцаагч О нь өөрийн найз, талийгаачийн ойр дотны хүн болох О-д зөвлөн, талийгаачид задлан шинжилгээ хийсэн мэтээр хуурамч тэмдэглэл хийлгэхийг санал болгосон аж. Улмаар тус аймгийн Бүсийн оношлогоо, эмчилгээний төвийн эмгэг судлалын тасгийн эмгэг судлаач эмч Ц-тэй ярилцаж, асуудлыг зохицуулжээ. Иргэн О-гийн өгсөн өвчтний түүхийг үндэслэн эмч талийгаачид шинжилгээ хийсэн мэтээр хуурамч тэмдэглэл үйлдэн, гарын үсэг, тамга тэмдгээр баталгаажуулсан байна. Эмч Ц-гийн хийсэн задлан шинжилгээний тэмдэглэл хуурамч гэдгийг мэдсээр байж тэмдэглэлийг үндэслэн мэргэжлийн хяналтын улсын байцаагч О талийгаач Д-гийн өвчин мэргэжлээс шалтгаалсан өвчний бүлэгт хамаарах тухай хуурамч дүгнэлт үйлдэж, уг дүгнэлтээр нөхөн төлбөр олгох үндэслэлтэй гэх дүгнэлтийг мөн хуурамчаар үйлджээ.
Задлан шинжилгээний хуурамч тэмдэглэл үйлдэж өгснийх нь хариуд иргэн О өнөөх эмчид 300 мянган төгрөгийг “Буяны юм” нэрийдлээр өгсөн аж.
Дээрх хэргийг Авлигатай тэмцэх газрын Мөрдөн шалгах хэлтсээс шалгаж илрүүлсэн байна.