Иргэдэд туслах хүний эр­хийн төв, Хүчирхийллийн эсрэг үндэсний төв, Монголын эмэгтэйчүүдийн сангийн санаа­чил­гатайгаар Монгол Улсын Ерөнхийлөгчийн дэргэдэх “Иргэний танхим”-д өчигдөр “Хүүхдийн бэлгийн халдашгүй байдал ба бэлгийн болзошгүй хүчирхийллээс хамгаалах нь” сэдэвт нээлттэй хэлэлцүүлэг болж өндөрлөлөө.

Хэлэлцүүлэгт Эрүүл мэндийн яам, Боловсрол, соёл, шинжлэх ухааны яам, Нийслэлийн Шүүх, Цагдаагийн ерөнхий газар, Хүний эрхийн үндэсний комисс, Шүүх шинжилгээний үндэсний хүрээлэн, төрийн бус байгууллагуудын төлөөлөл оролц­сон байна. Судалгаагаар хүчирхийлэлд өртсөн охид, бүсгүйчүүдийн найман хувь нь л огт танихгүй хүнд хүчир­хийлүүлсэн гэсэн бол 33 хувь нь хойд эцэгтээ, 59 хувь нь хамаатан садан, танил тал, хүмүүстээ хүчирхийлүүлсэн аж.  Иймд энэ нөхцөл байдалд дүгнэлт хийх хэрэгтэйг оролцогчид дуул­гав. Эдгээр хохирогчдод туслах зорилгоор өнгөрсөн оны арванхоёрдугаар сараас эхэлж Шүүх эмнэлгийн дэргэд “Нэг цэгийн үйлчилгээ” төв ажиллуулах болсон байна. Үүнийг өргөжүүлэх шаардлагатайг хэлэлцээд эдгээр төвийг нийслэлийн есөн дүүрэгт  ажиллуулахад 60-70 сая төгрөг шаардлагатай гэх тооцоог гаргасан байна. Оролцогчид гэр бүлийн болон бэлгийн хүчирхийлэлд өр­төг­с­дөд тусламж, үйлчилгээ үзүүлэх эмнэлэгт түшиглэсэн нэг цэгийн үйлчилгээний төвийн тоог нэмэгдүүлэх, охидын мэр­гэшсэн эмч бэлтгэх, хүүхдийг хүчирхийлэлд өртө­хөөс урьд­чилан сэргийлэх зорил­гоор ерөнхий боловсролын сургуу­лиудын хичээ­лийн хөтөл­бөрт энэ талын хичээл оруулах шаардлагатай байгаа талаар эрх бүхий албан тушаал­тануудад саналаа хүргүүллээ.

Зохиогчийн эрх "Ардын эрх"