Засгийн газрын ээлжит хуралдаан 10.00 цагт зарлагдаад байна. Энэ удаагийн хуралдаанаар 10 гаруй асуудлыг авч хэлэлцэхээр төлөвлөсний дотор УИХ-ын гишүүн С.Эрдэнийн санаачлан боловсруулсан Нийгмийн даатгалын тухай хуулиудыг хэрэгжүүлэх журмын тухай  хуульд нэмэлт оруулах тухай, Нийгмийн даатгалын сангаас олгох тэтгэвэр, тэтгэмжийн тухай хуульд нэмэлт оруулах тухай хуулийн төсөлд өгөх Засгийн газрын санал, дүгнэлт, УИХ-ын гишүүн Ц.Баярсайхан, Р.Буд нарын санаачлан боловсруулсан Зээлийн батлан даалтын сангийн тухай болон холбогдох бусад хуульд нэмэлт, өөрчлөлт оруулах тухай хуулиудын төсөлд өгөх Засгийн газрын санал, дүгнэлтийн төслийг авч хэлэлцэх юм байна.

Мөн Өмнөговь аймагт өрнөж буй бүтээн байгуулалтын ажлын орон нутагт үзүүлж байгаа нөлөөлөл, цаашид анхаарах асуудлын талаар Засаг дарга Б.Бадраагийн мэдээллийг сонсох бол Зарим мэргэжлийн сургалт үйлдвэрлэлийн төвийг шинээр байгуулах тухай, Засгийн газрын тогтоолд өөрчлөлт оруулах тухай асуудлыг авч хэлэлцэнэ. Түүнчлэн нууц асуудал багтжээ. Танилцуулах асуудлын жагсаалтад аймаг, нийслэлийн иргэдийн Төлөөлөгчдийн хурал, тэргүүлэгчдээс 2010 онд зохион байгуулж хэрэгжүүлсэн ажил, түүний дүнгийн тухай, Орон нутгийн 2011 оны төсвийн нэгтгэл, төсвийн хууль зөрчсөн шийдвэрүүдийн тухай багтаасан байна. Мөн Монгол Улсын 2010 оны төсвийн гүйцэтгэл, Засгийн газрын санхүүгийн тайланд хийсэн аудитын дүгнэлтийн тухай, АСЕМ-ын уулзалтад оролцох тухай, Хөдөлмөрийн аюулгүй ажиллагаа, эрүүл ахуйн орчныг сайжруулах үндэсний хөтөлбөрийн хэрэгжилтийн тухай танилцуулахаар оруулжээ.