Өнгөрсөн оны долдугаар сарын нагоя башёд нэг ч өвдөг шороодолгүй 100 хувийн амжилтаар түрүүлсэн ч Эзэн хааны цом гардаагүй Хакухо М.Даваажаргал башё өндөрлөхөд нулимс унагаж байсан. Энэ удаад ч ёкозуна Хакухо цомгүй, шагналгүй башёд түрүүллээ. Японы олон зуун жилийн түүхтэй сумо бөхийн ертөнцийг донсолгож, 25 сумочийг огцруулсан “даваа наймаалцах” хэргийн улмаас Сумогийн холбоо гуравдугаар сард болох байсан хару башёг цуцалж, тавдугаар сарын нацу башёг ч хийхгүй байхаар шийдвэрлэсэн билээ. Оронд нь долдугаар сард болох башёгийн банзүкэ буюу бөхчүүдийн чансааны жагсаалтыг гаргах зорилгоор сорилго барилдааныг хийхээр болсон юм. Улмаар энэ сарын 8-нд эхэлсэн сумочдын чансаа тодорхойлох башё өнөөдөр өндөрлөлөө.

“Гирё-шинса башё” нэрээр зохиогдсон тус барилдаан Токио хотын Кокугикан ордонд ердийн башётай адил 15 хоног үргэлжилсэн бөгөөд макүүчи буюу дээд зиндаанд Монголын найман сумоч зодоглолоо. Харин жюүрё зиндаанд Монголын төлөөлөл байсангүй ээ.

Мэргэжлийн сумогийн 69 дэх ёкозуна Хакухо М.Даваажаргалын тухайд 13 дахь өдрийн барилдаанд озэки Харумафүжи Б.Бямбадоржид, мөн сүүлийн өдрийн барилдаанд озэки Кайод өвдөг шороодсоноор 13 даваа, хоёр унаатай сорилго барилдааныг өндөрлүүллээ. Монголын бусад сумочдын хувьд озэки Харумафүжи 10 даваа, таван унаатай, комүсүби Какурюү М.Ананд 12 даваа, гурван унаатай, Кёкүтэнхо Н.Цэвэгням, Токитэнкү А.Хүчитбаатар нар тус бүр найман даваа, долоон унаатай башёг дуусгасан бол Шотэнро Д.Нямсүрэн 4-11, Тамаваши Б.Мөнх-Оргил 7-8, Асасэкирюү Б.Дашням 7-8 гэсэн амжилт гаргалаа.