Монгол, Оросын хамтарсан зөвлөлийн хурал өнгөрсөн долоо хоногийн халуун сэдэв байлаа. Өндөржүүлсэн хамгаалалт дор, олны хөлөөс зайдуухан, хаалттай хуралдсан “совет”-ыг тойрсон асуудал асуултын тэмдэг хэвээр байна. Хуралд “Эрдэнэт” үйлдвэр болон “Монголросцветмет” үйлдвэрийн удирдлагууд болон Төрийн өмчийн хорооны дарга Д.Сугар, Засгийн газрын Хэрэг эрхлэх газрын Тэргүүн дэд дарга С.Солонго нарын албаны хүмүүс оролцжээ. Түүнчлэн Оросын талыг төлөөлж 10 орчим хүн ирсэн гэх мэдээлэл байна.

Тэд хамтарсан үйлдвэрүүдийн өнгөрсөн оны санхүүгийн тайлан, энэ жилийн ажлын төлөвлөгөөг хэлэлцсэн гэх албаны мэдээлэл байгаа ч хурал халуухан болсон сурагтай. Тухайлбал, “Монголросцветмет” нэгдлийн санхүүгийн тооцоонд зөрүү гарч, хурал сунжирахад хүрсэн бол “Эрдэнэт” үйлдвэрийн захирлыг солих тухай асуудлыг хөндөж, улмаар тус үйлдвэрийг хувьчлах асуудал ч яригджээ. Хувьчлалын асуудлыг Оросын тал эртнээс тавьж байсан боловч Монголын талыг харзнаж байгаа гэдэг. Харин олны анхаарлын төвд байгаа “Эрдэнэт”-ийн Ерөнхий захирал Ч.Ганзоригийг өөрчлөх асуудлыг энэ удаагийн хурлаар хэлэлцээд хойшлуулсан гэх мэдээлэл байна.