Орчин үеийн бүжиг сонирхогч, бүжгийн жинхэнэ хорхойтнууд энд тэндхийн клубүүдэд сэмхэн “дайтдаг”. Харин тэд өнөөдөр “АСА” циркийн тайзыг сонгожээ. “Нэг ертөнц-Show Dance” нэртэй бүх төрлийн бүжгийн шоу тоглолтыг "Монголын хип хоп" төрийн бус байгууллага болон "UB Dance" сургууль хамтран зохион байгуулж байна. Энэхүү бүжгийн халз тулааны ялагч нь нэг сая төгрөгийн шагналын эзэн болох юм.
Бүжгийн тулаан хоёр үе шаттай болно. Эхний тоглолт 15.00 цагт бүх төрлийн бүжгийн үзүүлбэр хэлбэрээр, харин дараагийн тоглолт 19.00 цагт орчин үеийн бүжгийн халз тулаанаар үргэлжлэх ажээ. Тус шоунд хүүхэд залуусын шүтээн болсон чөлөөт бүжгийн хамтлагуудаас гадна “Түмэн эх”, Ардын дуу бүжгийн чуулгын бүжигчид оролцох юм.

Тоглолтын агуулга, найруулга, зохиомж урьд өмнөх бүжгийн шоунуудаас өвөрмөц болно гэж зохион байгуулагчид нь амлаж байлаа.