Гадаад харилцааны яаманд өнөөдөр “Геополитиктийн шинэ нөхцөл байдал: Судлаачдын үзэл бодол” сэдэвт эрдэм шинжилгээний бага хурал болж байна. Уг арга хэмжээг Монгол Улсын орчин үеийн дипломат албаны 100 жилийн ойд зориулжээ. Бага хурал хоёр хэсэгтэй бөгөөд  “Гадаад орчны өөрчлөлт: геополитикийн шинэ нөхцөл байдал”, “Геополитикийн шинэ нөхцөл байдал: улс орны хөгжлийн тулгамдсан зарим асуудал” гэсэн хоёр хуралдаанаар илтгэлүүд сонсч байгаа юм.  Гадаад харилцааны сайд Г.Занданшатар нээлтийн үг хэлсний дараа Монгол Улсаас Австри улсад суугаа Онц бөгөөд Бүрэн эрхт элчин сайд Ж.Энхсайхан, Геополитикийн хүрээлэнгийн захирал Д.Мягмар, Үндэсний хөгжлийн хүрээлэнгийн эрдэмтэн нарийн бичгийн дарга, Геополитикийн хүрээлэнгийн эрдмийн зөвлөлийн гишүүн Л.Цэдэндамба нарын илтгэлийг сонслоо.

Илтгэгчдийн хэлснээр сүүлийн жилүүдэд Монгол Улсын геополитикийн нөхцөл байдал ихээхэн өөрчлөгджээ. Монголын ашигт малтмалын асар их баялаг дэлхийн том гүрнүүдийн анхаарлыг татах болж, тэдгээр орны геостратегийн бодлогын хүрээнд орох магадлал мэдрэгдэж эхэлжээ. Иймд нөхцөл байдлыг анхаарлын төвд байлгах үүднээс саяхан шинээр Геополитикийн хүрээлэнг байгуулсан байна.

Орчин үед геополитикийн бодлогоос гео-эдийн засгийн бодлого руу шилжих хандлага үзэгдэх болсон талаар илтгэгчид дурдлаа. Дэлхий нийтэд Европын соёл иргэншлийн нөлөө суларч, хойд Америкийн нөлөө ихээхэн өөр болж, дорнын соёл иргэншлийн хамрах хүрээ өсөх хандлагатай болжээ. Хятад-исламын орнуудын соёл иргэншил нягтарч, Майя зэрэг эртний соёл уламжлалд дулдуйдсан өмнөд Америкийн соёл эргэн ирж ирж буй байдал ажиглагдах болсон талаар бага хуралд оролцогчид ярилаа. Ингэж геополитикийн нөхцөл байдал хувирч буй үед Монгол Улс үндэсний ёс заншил, нүүдлийн ахуй, оюуны өв сангаа хадгалан үлдэх нь чухал болохыг тэд онцолж байв. Бага хурлын үйл ажиллагаа үдээс хойш чөлөөт хэлэлцүүлгээр үргэлжилнэ.