Японд ажиллаж, амьдарч буй Монголын мэргэжлийн урлагийн уран бүтээлчид тавдугаар сарын 14-ний өдөр Токио хотод “Бид хамтдаа” хандивын тоглолтыг зохиолоо. Тоглолтыг заал дүүрэн хүн үзэж сонирхсон бөгөөд тоглолтын орлого болон цугларсан хандив болох 429,339 иeн буюу 6.504.485 төгрөгийг гамшигт нэрвэгдэж өнөөг хүртэл хоргодох байранд хоног төөрүүлж буй Мияаги аймгийн Ишиномаки хотын иргэдэд зориулах юм.

Мөн энэ сарын 26-ний өдөр тус хотод Монголын ЭСЯ, МИАТ ХК-ийн Япон дахь төлөөлөгчийн  газар, Япон дахь Монгол оюутны холбоо болон Япон дахь Монголчуудын холбооныхон Ишиномаки хотод очиж, монгол үндэсний хоолоор үйлчлэхээр зэхэж байна. Өнгөрсөн гуравдугаар сард Японд тохиосон их газар хөдлөлт, түүнээс шалтгаалсан аймшигт цунамид тус бүсийн олон хот тосгод өртөж, олон мянган эрдэнэт хүний амь үрэгдэн, асар их хэмжээний хохирол учирсан билээ.