BBC телевизээс санаачлан хэ­рэг­­­­­­­­жүүлж буй “World Olympic Dreams” төслийн хүрээнд дэлхийн 26 тамирчныг сонгон, “Лондон-2012” олим­­­­­пийн наадамд амжилтын буу­­­хиагаа үргэлжлүүлэх гэсэн тэдний хү­­сэл зорилго, тэмүүлэл, амьдралын та­лаар богино хэмжээний баримтат нэвт­­­рүүлэг бэлтгэн телевиз, радио бо­­лон онлайн хэлбэрээр спорт сонир­хогчдод хүргэж байгаа юм. Шат дараа­­тай үргэлжилж буй энэхүү төслийн нэвтрүүлгийн зорилго нь тамирчин бүрийн түүх, хувь хүнд цогцолсон онцлог зан чанар, их спортод амжилт гаргахын тулд хэрхэн хөдөлмөрлөдөг, бэлтгэл сургуулилтаа хэрхэн хийдэг талаар болон тэдний дасгалжуулагч багш нар, хоолны дэглэм, гэр бүл, найз нөхөд, дуртай дургүй зүйлс гээд тухайн тамирчны мөн чанарыг харуулах явдал ажээ.

Төслийн гурав дахь үе шат өнгөрсөн оны долдугаар сарын 27-нд эхэлж, дэлхийн шилдэг 26 тамирчныг сонгон бэлтгэсэн нэвтрүүлгийг BBC-гээр цацаж эхэлсэн юм. Тэдгээр нь таван тивээс сонгогдсон спортын 20 өөр төрөлд хүч хөдөлмөр, амьд­­­ралаа зориулж яваа тамирчид бө­­гөөд Ямайкийн домог Усаин Болт, Косовогийн жүдоч Малинда Кел­­­менди, Францын дугуйч Жульен Абса­­лон, Британийн сагсан бөмбөгч Луол Денг, Энэтхэгийн мэргэн буудагч Абхи­­­нав Биндра нарын шилдгүүдийн эг­­нээнд Бээжингийн олимпийн авар­­га, Монгол Улсын Хөдөлмөрийн баа­­тар Э.Бадар-Ууган багтсан юм. BBC-гийн уран бүтээлчид өнгөрсөн оны гуравдугаар сард манай улсад ирж, олимпийн аваргын тухай өгүүлэх нэвтрүүлгийнхээ зу­­раг авалтыг хийгээд буцсан билээ. Энэ үеэр Э.Бадар-Ууганы гэр бүл, найз нөхөдтэй уулзаж, хүүхэд насаа өнгө­­­рүүлсэн 97 дугаар сургууль дээр зо­чилж байсан юм. Жилийн өмнө Мон­­голын олимпийн аваргын тухай нэвтрүүлэг хийхээр Монголд саатсан BBC телевизийн уран бүтээлчид тун удахгүй хоёр дахь нэвтрүүлгийнхээ зураг авалтыг хийхээр манай улсад ирэх гэж байгаа ажээ.

BBC-гийн “World Olympic Dreams” төслийн ээлжит шатанд хам­­­рагд­­­сан тамирчид 2010 оныг ямар ам­­жилт­­­тай үдсэн талаарх мэдээллээс түүвэр­­­лэн хүргэж байна.

Э.Бадар-Ууган /Монгол/
“Бээжин-2008” олимпийн наад­мын боксын рингэнд гялалзаж, ээлж да­­раалан өрсөлдөгчдөө илт илүүрхэн буул­­гаж авснаар олимпийн аварга бол­­­сон Э.Бадар-Ууганы хувьд 2010 он нам гүм байдалтай өнгөрчээ. Олим­­­пийн наадмаас хойш бэртэл, гэмт­­­лийн улмаас их спортоосоо хөн­­дийрөөд буй тэрбээр өнгөрсөн жил Казахстаны Ерөнхийлөгчийн нэрэм­­­жит цомын тэмцээнд оролцож, 57 кг-ын жинд хагас шигшээд шалгарсан ч бэртэл сэдэрснээр эргээд рингнээсээ хөндийрсөн юм. Мөн л бэртлийн шалт­­­­­гаанаар тэрбээр Гуанжоуд бол­­­­сон Азийн наадамд аваргын алтан меда­­­лиа хамгаалахаар өрсөлдөж чадаа­­­гүй билээ.

Жульен Абсалон /Франц/
Олимпийн хошой аварга Жульен Абсалон өнгөрсөн жил болсон уулын дугуйн “Дэлхийн цом”-ын зургаан тэмцээнд бүгдэд нь топ 10-т багтсан амжилт гаргасан. Ингэхдээ Германы  Оффенбургт болсон “Дэлхийн цом”-д түрүүлж, Италийн Вал ди Соле, Британийн Дальби Форестийн “Дэлхийн цом”-д хоёрдугаар байрт шал­­­гар­­­­­чээ. Мөн тэрбээр Франц ул­сын аварга шалгаруулах тэмцээнд түрүүл­­сэн боловч Канадад болсон дэлхийн аваргад тэргүүлэгчээс ердөө хоёрхон секундээр хоцорсноор тавдугаар байрт шалгарсан байна.

Ачьен Ажулу-Бушелл
/Их Британи/
Кени улсын уугуул иргэн боловч иргэншлээ сольж, тив, дэлхийн тав­цанд Их Британийг төлөөлөх болсон Ачьен Ажулу-Бушелл 2010 онд Брита­­­нийн улсын аварга шалгаруулах тэм­­­цээнд анх удаа оролцохдоо 50 болон 100 метрийн өврөөр даллах сэлэлтийн төрөлд аваргын алтан медаль зүүжээ. Улмаар Британийг төлөөлөн Европын аварга болон Хамтын нөхөрлөлийн орнуудын наадамд оролцсон байна. Будапештэд болсон Европын аваргад 16 настай Ачьен 100 метрийн урал­­­дааныг харьцангуй эрт орхисон боловч 50 метрийн зайд хагас шиг­­­шээд шалгарсан байна. Харин Делид болсон Хамтын нөхөрлөлийн орнуу­­дын наадамд тэрбээр өврөөр даллах сэлэлтийн ойрын зайн хоёр төрөлд хоёу­ланд нь финалд шалгарч, 50 метрийн зайд тавдугаарт, 100 метрт наймдугаар байрт шалгарчээ.

Абхинав Биндра /Энэтхэг/
Энэтхэгийн мэргэн буудагч Мюнхенд болсон буудлагын дэл­хийн аваргад 25 дугаар байрт бичигд­­сэнийхээ дараа өөрийгөө 2010 онд тун хан­­­­­галтгүй байсан, “олимпийн бус формтой” байлаа хэмээн дүгнэжээ. Хэдий­­гээр оргил амжилтаа гаргаагүй ч тэрбээр Хамтын нөхөрлөлийн орнуудын наадамд 10 метрийн хийн урт бууны төрөлд Энэтхэг улсын анхны алтан медалийг хүртэж, мөн тус наадмаас өөр төрөлд мөнгөн ме­­даль зүүсэн юм. Харин Гуанжоуд бол­­­сон Азийн наадамд тэрбээр зохион байгуулагчдын алдааны улмаас финалд шалгарах боломжоо алджээ. Хоёр өөр төрөлд олимпийн наадмаас авар­­­­гын алтан медаль хүртсэн Энэт­­хэгийн анхны бөгөөд цорын ганц тамир­­­чин болох Биндра 2010 онд хэ­­дийгээр уралдаан, тэмцээнд төдий л ам­­жилт гаргаагүй ч зөвхөн крикетийн спортод бүхий л анхаарлаа хандуулдаг энэт­хэгчүүдийг буудлагын спорт руу “уруу татаж” чадсан авьяаслаг тамир­чин юм.

Усаин Болт /Ямайк/
Олимпийн гурван алтан медальт Усаин Болтын хувьд 2010 он нам гүм өнгөрсөн. Тив, дэлхий, олимпийн тав­­цанд нэр алдраа цуурайтуулсан тэр­­­­­бээр өнгөрсөн жил домогт Майкл Жонсонгийн 300 метрт 30.85 секундын амжилтыг эвдэхээр хичээ­­­­­сэн ч бүтэлгүйтсэн юм. Мөн тэр­­­­бээр Шведийн Стокгольмд болсон Даймонд лигийн цувралд 100 метрийн зайд гол өрсөлдөгч Тайсон Гейд дийлдсэн нь түүний хувьд энэ зайд хоёр дахиа ялагдсан тохиолдол нь болсон билээ. Удалгүй тэрбээр гэмтэл авснаар 2010 онд дахин уралдааны талбарт гараагүй юм. Гэхдээ түүний хувьд өнгөсрөн жил туйлын таатай явдал тохиосон нь хөнгөн атлетикийн спортын түүхэнд байгаагүй үнэтэй гэрээг Puma-тай байгуулсан. Тэр нь 21 сая фунт стерлингээр үнэлэгдсэн юм. Харин өдгөө тэрбээр энэ жил Өмнөд Солонгосын Дэгүд болох дэл­хийн аваргаар 100 болон 200 мет­рийн зайд дэлхийн аварга цолоо хам­­гаалахаар бэлтгэж байна. Мэдээж дэл­хийн рекордыг шинэчлэх бодол ч түүнд байгаа нь гарцаагүй.

Луол Денг /Их Британи/
Дэлхийн хамгийн хүчирхэг лиг NBA-ын “Чикаго Буллз” багийн тог­­­­логч Луол Денг өнгөрсөн жил ул­­сын­­хаа шигшээ багийн гол хүн нь байж, и­рэх жилийн Европын аварга шал­­­­га­­­­­руулах тэмцээний сонгон шалга­­­руу­­­лал­тад Британичууд амжилттай орол­­­­цоход гол ачааг нуруундаа үүрсэн нэ­­­­­­­­­­­­­гэн. Хэсгийн найман тоглолтоос зур­­­­­­­гаан хожил авснаар Их Британийн баг хэсгээ тэргүүлсэн билээ. Харин о­доо тэд­­­ний хувьд FIBA-гаас Их Бри­­­­та­­­­­­­­­­­­нид Лондонгийн олимпод оролцох эрх өгөх эсэхийг хүлээх  үлдээд бай­­на. Харин NBA-ын будагтай талбайд Луол Денг “Бухнууд”-ын хамт өнгөр­­­­сөн жил плей-оффт хүч сорьсон.

Сара Менезес /Бразил/
Бразилийн жүдоч Сара Менезес 2010 онд насанд хүрэгчдийн дэлхийн аваргаас анхны медалиа зүүжээ. Өнгөрсөн оны есдүгээр сард Токиод болсон дэлхийн аваргад тэрбээр 48 кг-ын жинд өрсөлдөж, хүрэл медаль зүүсэн юм. Гэхдээ тэрнээс өмнөх хоёр жилд тэрбээр залуучуудын дэлхийн аваргад дараалан түрүүлж байжээ. Түүнчлэн өнгөрсөн жил “Дэлхийн цом”-ын тэмцээнд хоёр ч удаа финалдаж, Сау-Паулуд өөрийнхөө төрөлх нутагт алт зүүж, дараа нь Унгарын Будапештэд болсон “Дэлхийн цом”-оос мөнгөн медаль хүртсэн байна. Харин дараа нь арванхоёрдугаар сард Токиод болсон “Их дуулга”-д тэрбээр хагас шигшээд Японы Каори Кондод ялагдсанаар хүрэл медалийн эзэн болжээ.

Хоанг Ан Туан /Вьетнам/
Бээжингийн олимпийн мөнгөн медальт, дэлхийн аваргын хошой хүрэл медальт Вьетнамын хүндийг өргөгч Хоанг Ан Туан Туркт болсон 2010 оны дэлхийн аваргад 56 кг-ын жинд хүч сорьж, дөрөвдүгээр байрт шалгарчээ. Тэрбээр шууд өргөлтөөр 123 кг-ыг, харин түлхэлттэй өргөлтөөр 150 кг-ыг өргөсөн байна. Нийлбэр 273 кг-ыг өргөсөн амжилт нь Бээжингийн олимпийн амжилтаас нь даруй 17 кг-аар бага ажээ.

Иван Ухов /ОХУ/
ОХУ-ын өндрийн харайлтын тамирчин Иван Уховын хувьд 2010 он Лондонгийн олимпийн өмнө ур чадвар, хичээл зүтгэлээ тайлагнасан үр дүнтэй, чухал цаг мөч байлаа. Катарт болсон заалны дэлхийн аваргад 2,36 метр дээгүүр харайж, аваргын алтан медаль хүртэн 2010 оны гараагаа тун сайн эхлүүлсэн тэрбээр Барселонад болсон Европын аваргад мөнгөн медаль зүүсэн юм. Тэрбээр мөн Лондон болон Цюрихт болсон Даймонд лигийн цувралд түрүүлснээс гадна Польшид болсон Опоелийн фестивальд Ухов хувийн дээд амжилтаа эвджээ. 2010 оныг амжилт дүүрэн үдсэн тэрбээр “Лондон-2012” олимпийн наадмын хүчтэй өрсөлдөгчдийн нэг байх нь гарцаагүй.