Ойрхи Дорнодыг хамарсан ширүүхэн бослого үймээний давалгаа Иракийн үүрэн телефон хэрэглэгчдийг ч нэгтгэж, эсэргүүцлээ илэрхийлэхэд хүргэжээ. Иракийн гар утас хэрэглэгчид тус улсад үйл ажиллагаа явуулдаг Кувэйтийн гар утасны оператор Заин компанийн эсрэг бослого зохион байгуулахаар зэхэж байна. Учир нь сүүлийн жилүүдэд Иракт үүрэн телефоны чанар муудаж, хамрах хүрээ улам багасч, гар утас хэрэглэх нь төвөгтэй үзэгдэл болжээ.

Тиймээс үзэл бодол нэгдсэн хэсэг бүлэг хүмүүс и-мэйлиэр болон Facebook-ээр гар утас хэрэглэгчдэд хандаж, тавдугаар сарын 21-ний өдөр нэг бүтэн өдрийн турш гар утсаа унтраахыг уриалж эхэлжээ. Заин компани нь Ирак даяар 10 сая орчим хэрэглэгчидтэй бөгөөд 2010 оноос эхлэн сүлжээ нь доголдож, байнга тасрах, дуудлага хийхийн тулд нэгээс дээш удаа дугаараа оруулах шаардлагатай болсон байна. Харин үүнийг Иракийн засгийн газар шүүмжилж, сүлжээгээ сэлбэж, шинэчлэх, үгүй бол улсад лицензээ буцаан өгөхийг шаардсан боловч, одоог хүртэл үр дүнд хүрэхгүй байгаа ажээ.