“Манчестер Юнайтед” өчигдөр орой лигийн гол өрсөлдөгч болох “Челси”-г талбайдаа хүлээн авч, 2:1 харьцаатай буулган авснаар Премьер лигийн аваргын цом хүртэх замаа заслаа. Ийнхүү улирлын тоглолтууд өндөрлөхөд ердөө хоёрхон тоглолт үлдээд буй энэ үед “Улаан чөтгөрүүд”, Лондонгийн “Цэнхрүүд”-ээс зургаан онооны давуутай болж байгаа юм. Одоо тэд энэ бямба гаригт “Блэкбурн”-ы талбайд хожих, эсвэл тэнцсэн тохиолдолд 19 дэх удаагаа лигийн цом өргөх болзлоо хангана. Тэрхүү тоглолтод хожигдсон ч “Улаан чөтгөрүүд” лигийн сүүлийн тойрогт доод дивизон руу унах аюулын ирмэгт байгаа “Блэкпуль”-ийг талбайдаа хүлээн авах билээ. Түүнчлэн “МанЮ” энэ сарын 28-нд Английн алдарт “Уэмбли” цэнгэлдэхэд Аваргуудын лигийн финалд Испанийн “Барселона” багтай халз тулна.

Өчигдрийн тоглолтын дараа Сэр Алекс Фергусон Sky Sports-т өгсөн ярилцлагадаа “Тоглогчдыг сайн мэдэхийн хувьд тэд ямар ч алдаа гаргаагүй. Тэд оноогоо авч чадсан. Үүнд эргэлзэх зүйл байгаагүй” хэмээн ярьжээ.

Тус тоглолтын өмнө Лондонгийн “Арсенал” клуб “Стоук Сити”-гийн талбайд зочлон, 3:1 харьцаатай хожигдсоноор лигийг тэргүүлэгчдээс есөн онооны дутуу болж, аваргын төлөөх өрсөлдөөнөөс хасагдсан юм.

Харин “МанЮ”, “Челси”-гийн халз тулаанд Хавьер Эрнандез, Неманья Видич нар тоглолтын эхэн үед гоолдсоноор багтаа тэргүүлэл авчирсан. Шүүгч шүглээ үглээж, тоглолт эхэлснээс хойш ердөө 36-хан секундын дотор Рьян Гиггз, Пак Чисон нарын тусламжтайгаар “Чичарито” тооны харьцааг нээсэн. Харин дараа нь, 23 дахь минутад Гиггзийн хөндлөн дамжуулалтыг Видич мөргөн, чулуу болгосон юм. Хоёрдугаар үеийн дундуур буюу 68 дахь минутад Лампард гоолдсоноор багийнхаа итгэл найдварыг сэргээсэн ч “Мөрөөдлийн театр”-т цугласан 75 мянга гаруй хөгжөөн дэмжигчид дахин гоолын бараа хараагүй. Тоглолт 2:1 харьцаатай талбайн эздийн давамгайлал дор өндөрлөсөн юм.

Мөн өчигдөр “Вулверхэмптон” талбайдаа “Уэст Бром”-ыг хүлээн авч, 3:1 харьцаатай буулган авсан. Харин өнөөдөр “Ливерпуль” нийслэл хотын баг “Фулхэм”-ийн талбайд зочлох бол маргааш “Манчестер Сити” талбайдаа “Тоттенхэм”-ийг хүлээн авна.