“Ливерпулийн дөрвөл”-ийн нэг буюу алдарт “Beatles” хамтлагийн дуучин, дууны үг, ая зохиогч, 68 настай Paul McCartney найз бүсгүй Nancy Shevell-тэй гэрлэхээр шийджээ. Дөрвөн жилийн өмнөөс "учир ургуулсан” хосууд сүй тавьсан тухай алдарт дуучны хэвлэлийн төлөөлөгч албан ёсоор мэдэгдсэн байна. 2007 оны зун Хэмптонст амарч байхдаа танилцсан хосууд “үнэхээр бие биедээ заяагдсан, гайхалтай сайхан хос” хэмээн тэдний ойрын эх сурвалж “People” сэтгүүлийнхэнд ярьжээ.

Өмнө нь Америкийн гэрэл зурагчин Linda Eastman болон модель Heather Mills нартай амьдралаа холбож байсан Paul-ын хувьд энэ нь гурав дахь гэрлэлт нь байх болно. Түүний анхны эхнэр Linda 1998 онд хавдраар нас барсан бөгөөд Paul 2002 онд Heather-тэй гэрлэсэн ч зургаан жил хамт амьдраад гэр бүлээ цуцлуулсан билээ.
Харин шинэ сүйт бүсгүй Nance Shevell нь өдгөө 51 настай, Нью-Йорк хотын “бизнесвумен”. Paul-той сүй тавьсан тухай тодруулахаар Nancy-тэй холбогдсон “AP” агентлагийн сурвалжлагчийн асуултад тэрбээр “Тийм ээ, энэ үнэн. Тэгээд л тэр. Баярлалаа, амралтын өдрүүдээ сайхан өнгөрүүлээрэй” гэсээр утсаа тасалжээ. Хосуудын хуримын тов одоогоор тодорхойгүй, тэд өөрсдөө ч энэ талаар дэлгэрэнгүй мэдээлэл өгөхөөс татгалзаж байгаа гэнэ.