Планшетийн хэрэглээ улам өргөжиж байна. Одоогоор ихэнх зоогийн газар, ресторанаар үйлчлүүлэхэд зөөгч хоолны цэс авчирч өгч, захиалга авч, тооцоог хураан авдаг. Харин энэ байдал удахгүй өөрчлөгдөж, зөөгчийн ажил орон тооноос хасагдаж магадгүй байна. Учир нь зөөгчийн ажлыг хөнгөвчилж, өмнөөс нь үүрэг гүйцэтгэх планшетийг зохион бүтээгчид боловсруулсан ба АНУ-ын Сан Франциско, Бостон орчмын 20 ресторан болон Applebee-ийн сүлжээ ресторанууд энэхүү планшетийг үйлчилгээндээ нэвтрүүлж эхэлжээ.

Планшетийн дэлгэц дээрх электрон менюнд бүхий л хоол, ундааны зургийг оруулж, тэндээс үйлчлүүлэгчид сонголтоо хийх бөгөөд хүмүүс захиалсан хоол, ундаа ирэхийг хүлээж суух зуур меню планшетаар видео тоглоом тоглох боломжтой гэнэ. Мөн Хятадын Гуаньжоу дахь Хөнг Бао ресторан зөөгчийн ажлын байрыг үйлчилгээнээсээ халж, цэсний оронд Apple-ийн iPad-уудыг ширээнүүд дээрээ байрлуулжээ. Монгол улс ч аливаа шинэ техник хэрэгслүүдээс хоцордоггүй тул ийм төрлийн шинэ системийг тун удахгүй нэвтрүүлнэ гэдэгт миний бие итгэлтэй байна.