УИХ-ын чуулганы баасан гаригийн үдээс хойшхи хуралдаанаар ОХУ-ын өмчлөлтэй найман байрыг Монголын талд шилжүүлэхтэй холбоотойгоор тавьсан асуулгын хариуг сонсч, гишүүд сонирхсон асуултдаа хариулт авч дууссанаар өндөрлүүллээ. УИХ-ын гишүүдийн зүгээс энэхүү найман байр нь жижиг асуудал гэсэн байдлаар хандаж байна. Гол нь сэтгэл, зүтгэл дутсанаас асуудлыг шийдвэрлэж чадахгүй өнөөг хүргэсэн гэж үзэж буй юм. Гэхдээ УИХ-ын гишүүн Ц.Мөнх-Оргилын хувьд арай өөр байр суурьтай байна. Тэрбээр “Жижиг асуудал мэт санагдаж болох ч асуудал сунжраад байвал хоёр улсын харилцаанд сэв суулгаж болзошгүй тул бодитой хандах хэрэгтэй байна” гэлээ.

Харин асуулга тавьсан УИХ-ын гишүүн Д.Ганхуяг асуулгын хариуг дүгнэж хэлэхдээ,  энэ асуудлыг гурав дахь удаагаа Гадаад харилцааны яаманд хандан тавьж буйг сануулав. Тэрээр “Хэдийгээр зарим хүнд жижиг асуудал, тэр дундаа УИХ-ын гишүүн Д.Ганхуягийн тойргийнхонтой хамаарах асуудал мэт харагдах боловч, энэ нь цаанаа 3000 хүнтэй холбоотой асуудал” хэмээн үзэж байна. ОХУ-ын өмчлөлтэй байранд амьдардаг иргэдийн  хувьд хэзээ байрнаасаа хөөгдөх бол, байрны түрээсээ Оросын тал хэзээ нэмдэг бол гэсэн үргэлжийн айдастай байдаг. Үл хөдлөх хөрөнгийн тухай хууль, Үндсэн хуулиа харах юм бол ямар ч обьект газраасаа салсан цагт үнэ цэнээ алддаг. Тийм учраас энэ асуудлыг шуурхайлахын тулд зориуд нэг хүн томилж, шийдвэрлэх шаардлагатай байгааг хуралдааны төгсгөлд онцлов.