Сагсан бөмбөгийн Спрайт супер лигийн аваргын төлөөх тоглолтууд эхэллээ. Эрэгтэй, эмэгтэй төрөлд аваргын төлөө өрсөлдөхөөр шалгарсан багуудын цувралын эхний тоглолтууд өчигдөр Спортын төв ордонд болсон юм.
Эрэгтэйчүүдийн төрөлд финалд шалгарсан ИНЕГ-ын “Буянт-Ухаа” болон “Хаан банк” багийн эхний тоглолт эн тэнцүү өрсөлдөөн дунд үргэлжилсэн ч “Хаан банк” төгсгөлөө сайн гүйцэтгэснээр цувралын харьцааг 1:0 болгон тэргүүлж эхэллээ. 80:74 харьцаагаар өндөрлөсөн тус тоглолтод “Хаан банк” багаас Төгөлдөр 17, Эрдэнэдалай 16, Батжин 13 оноо тус тус авснаар багаа хожилд хүргэсэн бол ИНЕГ-ын багаас Нямдаваа 17, Тэмүүлэн, Удаанжаргал нар тус бүр 10 оноогоор багаа тэргүүлжээ.
Харин эмэгтэйчүүдийн төрөлд “Хөвсгөл Нэг үе” баг 93:54 харьцаагаар “Хаан банк”-ны багийг буулган авч, цувралыг тэргүүлж эхэллээ.
Аваргын төлөөх цувралын дараагийн тоглолтууд ирэх мягмар гаригт болно.