Долдугаар сарын 1-ний үймээнийг гардан зохион байгуулсан хэрэгт О.Магнай, Ж.Батзандан, Б.Жаргалсайхан нар холбогдон шалгагдаж байсан билээ. Тэдэнтэй холбоотой хэргийг дахин шалгаж өгөх хүсэлтийг  өнгөрөгч дөрөвдүгээр сарын 2-ны өдөр  үймээний үеэр бэртэж гэмтсэн цагдаагийн албан хаагчдын төлөөлөл нийслэлийн Прокурорын газарт тавьсан юм. Харин зарим эх сурвалжийн мэдээллээр О.Магнай, Б.Жаргалсайхан нарт холбогдох хэргийг сэргээн шалгаж эхэлсэн  гэх мэдээлэл байна. Уг мэдээллийг бодитой эсэхийг нийслэлийн Прокурорын газрын Мөрдөн байцаах ажиллагаанд хяналт тавих хэлтсийн дарга Т.Жадамбаас тодрууллаа.

-Б.Жаргалсайхан, О.Маг­най нарын хэргийг сэргээсэн гэж үнэн үү. Танайд шалгаж байгаа юу?

-Үймээнийг зохион бай­гуул­­сан хэрэгт сэжигтнээр та­таг­­даж байсан О.Магнай, Б.Жаргалсайхан, Ж.Батзандан нарын хэргийг манай Проку­ро­рын газраас Прокурорын дэргэдэх Мөрдөн байцаах алба руу шилжүүлсэн.

-Тэд цагдаа, прокурор, шүүхийн байгууллагын ажил­тан биш шүү дээ. Яагаад Прокурорын дэргэдэх Мөрдөн байцаах алба руу хэргийг нь шилжүүлсэн юм бол оо?

-2008 оны сонгуулийн  дараахи үймээний үеэр таван хүн амь үрэгдсэн хэрэгт  яллагдагчаар татагдсан Цагдаагийн  Ерөнхий газрын даргын үүрэг гүйцэтгэгч асан, хошууч генерал  Ч.Амар­болд нарын хэрэгтэй хамтатган шалгах болсон  юм билээ. Тэднийг  сонгуулийн да­раах үймээнийг гардан зо­хион байгуулсан хэрэгт та­тан шалгасан гэм буруутай үйлдэл нь нотлогдохгүй гэ­сэн үндэс­лэлээр хэргийг нь хэрэгсэхгүй болгосон байсан.  

-Танай нийслэлийн Проку­рорын газарт үймээний үеэр гэмтэж бэртсэн цагдаагийн албан хаагчдын төлөөлөл О.Магнай нараас нөхөн төл­бөр авах тухай хүсэлт гар­гасан. Тэр хүсэлтийн хариуг өгсөн үү?

-Бэртэж гэмтсэн цагдаагийн албан хаагчдад төрөөс нөхөн төлбөр олгосон шүү дээ.

-Тухайн үед нөхөн төлбөрт  хамрагдаагүй цагдаагийн ажилт­нууд танайд хүсэлт гар­гасан юм биш үү?

-Үймээн самуунаар хэдэн хүн бэртэж гэмтсэн, хэн хэн хохирсон талааархи судалгааг Цагдаагийн байгууллага өөрс­дөө гаргах ёстой шүү дээ. Бид­ний тогтоох ажил биш. Гэмтэж бэртсэн цагдаагийн албан хаагчдаас манай прокурорын газарт хандан гаргасан хүсэл­тийн хариуг өгсөн.