Бага ангийн сурагч долоон настай эмэгтэй Б, зургаан настай эрэгтэй М нар хоёрдугаар сарын 22-нд Төгрөг сумаас гарч, урагшаа 80 км-ийн зайтай Зэгстэй Өвөрт байдаг гэр рүүгээ гарсан байна. Хүүхдүүдийг сумаас явсан мэдээллийн дагуу сургуулийн захирлаар ахлуулсан 11 хүн ӨВА 31-53 улсын дугаартай УАЗ-469 маркийн автомашинтай эрлийн хэсэг 18:00 цагийн үед гарчээ. Эрлийн хэсэг Б,М нарыг мөн өдрийн шөнө буюу 01.20 цагт тус сумын 4 дүгээр багийн нутаг “Хаван зайсан” гэх хээр газраас олсон байна. Тэд сумын төвөөс 25 км холдсон байсан бөгөөд долоон настай Б-гийн баруун хөл бага зэрэг хөлдсөн байв.
Хугацаа хоцорсон бол хүүхдүүд хээр талд хөлдөж амь насаа алдах аюул тулгарах байсан юм. Тиймээс сурган хүмүүжүүлэгчид, эцэг эхчүүдийг бага насны хүүхдэдээ тавих хараа хяналтаа алдахгүй байхыг сануулж байна.
Н.Гантуяа /Монцамэ/.