Sony компани өөрийн PlayStation сүлжээний хэрэглэгчдэд нэгэн таагүй анхааруулгыг өглөө. Хэд хоногийн өмнө хакердуулсан PlayStation сүлжээ зөвхөн доголдож, хаагдаад зогсохгүй, сүлжээний хэрэглэгчдийн хувийн мэдээлэл төдийгүй дансны мэдээлэл алдагдсан байж болзошгүй байна. Тиймээс хэрэглэгчдийг утсаар болон и-мэйлээр ирж буй дуудлага, зурваст хянуур, болгоомжтой хандахыг Sony компанийн зүгээс анхааруулжээ.
Алдагдсан байж болзошгүй мэдээллийн дотор хэрэглэгчийн нэр, утасны дугаар, хаяг, улсын нэр, и-мэйль хаяг, төрсөн он, сар, өдөр, PlayStation сүлжээний нэвтрэх нэр, нууц үг болон төлбөрийн картны нууц дугаар, худалдан авалт хийсэн тухай мэдээллүүд зэрэг багтаж байна. Харин кибер гэмт хэрэг гараад нэлээд хугацаа өнгөрчхөөд байхад компанийн зүгээс болсон явдлыг нууцалсаар байсан нь хэрэглэгчдийн хувьд таагүй сэтгэгдэл, түгшүүрийг төрүүлж эхэлжээ.