Үндэсний статистикийн хороо өчигдрийн байдлаар Улаанбаатар хотын хүнсний зах, дэлгүүрт худалдаалагдаж байгаа хүнсний гол нэрийн бараа, бүтээгдэхүүний үнэд судалгаа хийжээ. Ингэхэд хүнсний гол нэрийн бараа, бүтээгдэхүүний үнэ өмнөх сарынхтай харьцуулахад нэг хувиар буурсан бол, өмнөх долоо хоногийнхтой харьцуулахад 4.9 хувиар өссөн байна.

Тухайлбал, өмнөх сараас хонины ястай махны үнэ 0.1 хувиар өссөн бол, хонины цул махны үнэ долоон хувь, үхрийн махны үнэ 0.3-4.0 хувь, адууны махны үнэ 7.8 хувь, ямааны махны үнэ 14.1 хувиар тус тус буурчээ.

Өмнөх долоон  хоногийн үнэтэй харьцуулахад хонины ястай махны үнэ 12.5  хувь,  үхрийн махны үнэ 1.3-8.3 хувиар өссөн бол, адуу, ямааны махны үнэ тогтвортой байгаа аж. Өчигдрийн байдлаар кг хонины  /ястай/ махны үнэ дунджаар 3813 төгрөг, үхрийн мах /ястай/-4388  төгрөг,  ямааны мах-2800  төгрөг,  адууны мах-3260  төгрөг,  хонины цул мах-3917  төгрөг, үхрийн цул мах-4863 төгрөгийн үнэтэй худалдаалагдаж байжээ.