Аль нэг банкны виза карт хэрэглэдэггүй хүн одоо үгүй биз ээ. Төв банкнаас явуулсан төлбөрийн картны хэрэглэгчийн судалгаараар 2010 оны жилийн эцсийн байдлаар 1.5 сая карт эзэмшигчдийн 2.2 их наяд төгрөгийн 26.9  сая ширхэг гүйлгээ хийгджээ. Карт эзэмшигчдийн 2010 оны тоог өмнөх оны үзүүлэлттэй харьцуулахад 346.7  мянга буюу 18 хувиар буурсан,  карт идэвхтэй ашиглагчдын тоо 194,6  мянга буюу 35 хувиар өссөн байна.

Арилжааны банк тус бүр өөрсдийн төлбөрийн картыг харилцагч нартаа нэвтрүүлснээр хэрэглэгчдийн дунд заавал тухайн банкны АТМ-ээр үйлчлүүлэх шаардлагатай байсан. Хэрвээ тухайн банкны АТМ байхгүй газарт харилцагч мөнгөө авах боломжгүй гэсэн үг юм.

Харин өнгөрсөн жилээс харилцагч нартаа АТМ хамаарахгүй үйлчлүүлэх боломж олгохоор “Банк хоорондын төлбөрийн картын нэгдсэн сүлжээ”-нд банкууд нэгдсэнээр “Нэг карт-Нэгдсэн сүлжээ” үйлчилгээ бүрэн утгаараа Монгол улсын иргэн бүрт хүрэх болсон. Өнгөрсөн оны жилийн эцсийн байдлаар “Нэг карт-Нэгдсэн сүлжээ” үйлчилгээг есөн банкны 367 ширхэг АТМ төхөөрөмж, 4 418 ширхэг  ПОС терминал, 1 576 ширхэг ПОБ терминал, 1  434  салбар банк болон 4 794  картаар үйлчлэгч байгууллагаар дамжуулан 24  цагийн турш тасралтгүй гүйцэтгэж байна.