Монгол Улс НҮБ-д элссэний 50 жилийн ойн хүрээнд Байнгын төлөөлөгчийн газраас Отизмын олон улсын өдөрт зориулан "Морь унасан хүүхэд" (The Horse Boy) кино өдөрлөгийг НҮБ-ын Хэвлэл мэдээллийн албатай хамтран энэ сарын 18-ны өдөр зохион байгуулав. Уг арга хэмжээг урьдчилан бэлтгэсэн хөтөлбөрийн дагуу зохион байгуулсан бөгөөд НҮБ-ын дэргэд суугаа Байнгын төлөөлөгчийн газруудын төлөөлөл, НҮБ-ын ажилтнууд, отизмын асуудлаар үйл ажиллагаа явуулдаг төрийн бус байгууллага, эрдэм шинжилгээ, судалгааны байгууллага, зохиолчдын төлөөлөгчид оролцов.

Кино өдөрлөгт уг киноны продюсер буюу гол дүрийн баатар болох Рован хүүгийн аав Руберт Исааксон хүрэлцэн ирж, Монгол Улсад байх хугацаандаа киноны зураг хэрхэн авсан, хүүгээ хэрхэн эмчилсэн, үр дүн нь хэрхэн гарч буй зэргийн талаар танилцуулж, төлөөлөгчдөөс тавьсан асуултад хариулсан нь уг арга хэмжээг сонирхолтой, амьд болгоход чухал ач холбогдолтой болов. Руберт Исааксон нь уг кино бүтээсний дараа отизмтой хүүхдийн эцэг эхэд туслах сан байгуулан ажиллуулж буй ажээ. Түүнд хэд хэдэн эцэг эхээс хүсэлт гарган улмаар Монголд очиж хүүхдээ эмчлүүлсэн талаар Руберт Исааксон танилцуулгын үеэр дурдав. 

Арга хэмжээний нээлтэд Байнгын төлөөлөгчийн зүгээс отизмын олон улсын өдрийг тэмдэглэн өнгөрүүлэхийн ач холбогдол, монголчуудын зан заншил, Монгол Улсын байгаль, цаг уурын онцлог хийгээд уг киногоор өгүүлэх үйл явдлын харилцан хамаарлын талаар товч ярисан байна.