Монгол Улсын Засгийн газрын шийдвэрээр иргэдэд олгох хувь хишгээс оюутнуудад  сургалтын төлбөр хэлбэрээр шилжүүлэхээр болсон билээ.  Сургалтын төлбөрийн 500 мянган төгрөг авах оюутнуудын өргөдөл, сургуулийн тодорхойлолтыг үндэслэн  Төрийн сангаар дамжуулан тухайн сургуулийн дансанд мөнгийг шилжүүлнэ. Оюутнуудын материал оройтож ирсэн учраас  мөнгө шилжүүлэх ажил удааширч байна гэх тайлбарыг холбогдох албаныхан өгч байгаа. Хөдөлмөр халамж үйлчилгээний газрын ахлах мэргэжилтэн Д.Ганчимэгээс өргөдөл, тодорхойлолтын тулгалтын явц ямар байгаа талаар тодруулсан юм.
-Оюутны мэдээллийн тулгалтын ажил хэр ахицтай байна?
-Өнөөдрийн байдлаар 21 аймаг, нийслэлийн есөн дүүргийн хөдөлмөр халамж үйлчилгээний газраар дамжуулан 128 мянга 744 оюутны өргөдөл, төрийн сангаар дамжуулан 109 их дээд сургууль, коллежийн  140 мянга 147 оюутны   мэдээлэл ирсэн байна. Манай хэлтсээс дүүргийн ажилчидаа дайчлан өргөдөл, тодорхойлолтын тулгалт хийж байгаа.
-Өргөдөл авах хугацаа дууссан уу?
-Өргөдөл хүлээн авч байгаа. Тухайн хүн тодорхой, хүндэтгэх шалтгааны улмаас хожимдсон байж болно.  
-109 их дээд сургууль  материалаа бүрэн өгсөн юм байна. Тулгалтын явцад ямар алдаа гарч байна?
-Төрийн өмчийн  18 их, дээд сургууль, төрийн бус өмчийн 91 сургуулийн материалд тулгалт хийж байна. Оюутнуудын регистрийн дугаар давхардах, хүний нэр буруу бичих,  зарим тохиолдолд  үг үсгийн алдаа  гарч байна. Тулгалтыг түргэвчлэх үүднээс  орон нутгаас ирсэн материалыг кодлож байгаа. Энэ нь тулгалтын явцыг хөнгөвчлөх давуу талтай юм.
 
Ш.Чимэг