Монголын Уран зургийн галерейд өнөөдөр 16.00 цагт “Хөх толбот ахан дүүс” дүрслэх урлагийн үзэсгэлэн нээлтээ хийх гэж байна. Сөүл, Улаанбаатар хотуудын хамтын ажиллагааг өргөжүүлэх, Солонгос, Монгол иргэдийн түүх соёл, ёс заншлыг харилцан сурталчлах зорилгоор нийслэлийн Засаг даргын Тамгын газар, нийслэлийн Соёл урлагийн газар, Сөүл хотын соёл мэдээллийн төв, Монголын Уран зургийн галерей хамтран дүрслэх урлагийн их дээд сургуулийн оюутнууд, залуу уран бүтээлчдийн дунд уралдаан зарласан юм. “Хөх толбот ахан дүүс” нэртэй энэхүү уралдаанд дүрслэх урлагийн бүх төрлөөр оролцож боломжтой байсан бөгөөд гурван сая төгрөгийн шагналын сантай юм.

Уралдаанд 70 орчим уран бүтээлчийн ур ухаанаа шингээж урласан уран зураг, монгол зураг, арьсан урлал, графикийн чиглэлээр туурвисан 100 гаруй бүтээлүүд ирсэн байна.

Тиймээс уран бүтээлчдийн үзэсгэлэнг гаргаж, шилдгүүдийг шалгаруулан шагнал гардуулах юм байна. “Хөх толбот ахан дүүс” уралдааны тэргүүн байрт шалгарсан уран бүтээлч өргөмжлөл, нөүтбүүкийн эзэн болох бол хоёрдугаар байрт өргөмжлөл, 32 Инчийн LCD телевизор, гуравдугаар байрт өргөмжлөл, Nikon фирмийн зургийн аппаратаар тус тус шагнан урамшуулах ажээ. Мөн дөрөв, тавдугаар байр тус бүрт хоёр оролцогчийг шалгаруулан өргөмжлөл, зургийн хэрэгслээр шагнах юм байна. Үзэсгэлэнд оролцсон нийт уран бүтээлчдийн бүтээлийг энэ сарын 15-ныг дуустал Монголын уран зургийн галерейд нийтэд толилуулна.