Олимпийн өмнөх жилийг гайхалтай амжилтаар эхлүүлж, “Дэлхийн цом”, “Гран-при” гээд Европын цуврал тэмцээнүүдээс хос алтан медаль хүртсэн ОУХМ П.Лхамдэгд Азийн аварга шалгаруулах тэмцээнээс аваргын алтан медаль хүртлээ. Арабын нэгдсэн Эмиратын Абу Дабид болж буй тивийн аварга шалгаруулах тэмцээний хоёр дахь өдөр эмэгтэйчүүдийн -78 кг-ын жинд барилдсан тэрбээр С хэсэгт сугалаа таарч, эхний тойргийн барилдаанд хийлж, улмаар Туркменистаны жүдоч Насиба Суркиеваг цэвэр ялснаар хэсгийн аварга болжээ. Хагас шигшээд П.Лхамдэгд Казахстаны Галия Улментаеваг хоёр вазаригаар ялж, харин аваргын алтан медалийн төлөө БНСУ-ын жүдоч Жён Гён-Миг юүко үнэлгээгээр буулган авчээ. 2007 оны Азийн аваргаас мөнгө, 2008 онд хүрэл медаль зүүж байсан П.Лхамдэгд ийнхүү тивийнхээ аваргаар тодорлоо.

Мөн өнөөдөр Азийн аваргын татамид зодоглосон Монголын цагаан өмсгөлтнүүдээс Монгол Улсын Хөдөлмөрийн баатар, Гавьяат тамирчин Н.Түвшинбаяр -100 кг-д, ОУХМ Ц.Наранжаргал эмэгтэйчүүдийн 70 кг-д тус тус хүрэл медаль хүртсэн байна. Харин 81 кг-д Г.Түвшинжаргал нэг ялж, нэг ялагдсанаар тэмцээнээ дуусгасан бол 90 кг-ын жинд Э.Энхбат Катарын бөхийг цэвэр ялж, Казахстаны бөх Тимур Болатад дийлдсэнээр дагах барилдаанд зодоглосон ч Хятадын Жен Зижаод хоёр юүко үнэлгэгээр ялагдаж, медалийн төлөө барилдах эрхгүй болжээ. Эрэгтэйчүүдийн +100 кг-д хүч үзсэн Н.Батсуурь харамсалтай нь хүрэл медалийн төлөөх шийдвэрлэх барилдаанд Казахстаны жүдоч Ержан Шынкеевт цэвэр ялагдсан байна. Харин эмэгтэйчүүдийн хамгийн хүнд жин болох +78 кг-ын жингийн барилдаан хараахан дуусаагүй байна. Энэ жинд эх орноо төлөөлж буй Гавьяат тамирчин Д.Цэрэнханд хагас шигшээд буюу мөнгөн медалийн төлөө Казахстаны Гулжан Иссановатай барилдахаар болоод байна.