Монголын хоккейн үндэсний шигшээ баг болон U18 буюу 18-аас доош насныхны шигшээ багийн тамирчид дэлхийн аварга шалгаруулах тэмцээний III дивизоны тэмцээнүүдэд оролцох боломжгүй болсон талаар Монголын хоккейн холбооноос албан ёсоор Олон улсын хоккейн холбоо /IIHF/-нд уламжилсан байна. Гол шалтгаан нь хөрөнгө мөнгө болон хоккейн хэрэгслийн дутмаг байдлын улмаас ийм шийдвэрт хүрэхээс өөр аргагүй болсон тухай Монголын хоккейн холбооны Ерөнхий нарийн бичгийн Ч.Баасандаваа захиандаа дурдсан аж. Энэ талаар IIHF-ийн албан ёсны вэбсайтад мэдээлжээ.

Монголын хоккейн үндэсний шигшээ баг Өмнөд Африкийн Кейптаун хотноо болох 2011 IIHF World Championship Division III тэмцээнд оролцох байсан бол 18-аас доош насныхны шигшээ баг Тайванийн Тайпейд болох 2011 IIHF World U18 Championship Division III тэмцээний А хэсэгт өрсөлдөх ёстой байсан юм.

Нэгэнт Монголын шигшээ багийн тамирчид дээрх тэмцээнүүдэд оролцох боломжгүйгээ мэдэгдсэн учир IIHF нь тэмцээнийг зохион байгуулагч орнуудтай хамтран тэмцээний хуваарьт шаардлагатай өөрчлөлт оруулах болно гэдгийг мөн мэдэгджээ. Гэхдээ Монголын багтай тоглох байсан багуудад шууд ялалт өгөх гэнэ.