Улсын Дээд шүүхийн Ерөнхий шүүгч, Шүүхийн Ерөнхий зөвлөлийн дарга Ц.Зориг Шүүгчдийн холбооны удирдах зөвлөлийн шинэ гишүүдийг хүлээн авч уулзлаа.Тэрбээр Улсын Дээд шүүхийн шүүгчид, аймаг, нийслэлийн шүүхийн Ерөнхий шүүгчдээс бүрддэг Шүүгчдийн зөвлөлийн олонхийн саналыг авч Шүүгчдийн холбооны удирдлагад сонгогдсонд нь тус холбооны тэргүүн Б.Батцэрэн болон удирдах зөвлөлийн гишүүдэд баяр хүргээд цаашдын ажилд нь амжилт хүсч, санал бодлоо солилцов.

        Ц.Зориг энэ үеэр тус холбоо нь цаашдаа шүүгчдийн эрх ашгийг хамгаалах, Дэлхийн шүүгчдийн холбоотой харилцаа тогтоох, олон нийтэд ил тод нээлттэй ажиллах, гишүүдийнхээ нийгмийн асуудлыг шийдвэрлэх, дүрмээ өөрчлөх зэргээр олон ажил хийх шаардлагатай байгааг хэлсэн байна. Шүүгчдийн холбооны шинэ удирдах зөвлөл мөн хурлаа хийв. Энэ хуралдаанаас шүүхийн нэр хүндийг дээшлүүлэх, гишүүдийнхээ хуульд нийцсэн, ёс зүйтэй үйл ажиллагааг хамгаалах, гадаад харилцаагаа өргөжүүлэх, гишүүдээ хөгжүүлэх, соён гэгээрүүлэх зэргийг тус холбооны ажиллах чиглэл хэмээн тодорхойллоо.