Драмын урлагийн
шилдгүүд тодорсоор байна. Хэдхэн минутын өмнө Драмын төрлийн шилдэг эрэгтэй туслах,
эмэгтэй туслах дүр, шилдэг зураач номинацийг тодруулсан. Харин одоо шилдэг эмэгтэй гол дүр номинацид “Хунгийн дуу” жүжгийн Аннагийн дүрээр Ардын жүжигчин, төрийн соёрхолт Н.Сувд шилдгээр
шалгарлаа. Жүжигчин Н.Сувд “Надтай
хамт нэр дэвшсэн охидууддаа баярлалаа, өнөөдөр загнуулаад сурч
байсан төгсөгчид минь нэр дэвшиж
байна. Энэ шагналыг авахад хамтран зүтгэсэн уран бүтээлчид, арын алба, захиргааныхандаа бүгдэд нь их баярлалаа.
Цаашдаа ч их урлагтаа зүтгэхээ амлаж байна”
хэмээн хэлэв.
Шилдэг эрэгтэй
гол дүр номинацийн эзнээр “Би ч гэсэн жаргамаар байна” жүжгээр С.Болд-Эрдэнэ
шалгарлаа. Тэрбээр “Найруулагч
Н.Наранбаатарт баярлалаа, жүжгийнхээ хамт олонд маш их баярлалаа. Хайртай гэр бүл, багш нартаа баярлалаа.
Аавдаа, ээждээ хайртай шүү. Театрынхаа хамт олондоо баярлаж явдаг шүү, энэ шагнал та бүгдийн минь шагнал шүү” хэмээн талархал
илэрхийлэв.
Оны шилдэг
найруулагч номинацид “Хунгийн дуу” жүжгийн найруулагч урлагийн гавьяат зүтгэлтэн, Ардын жүжигчин Б.Мөнхдорж шалгарлаа.
М.Дөл