Улсын дээд шүүх өнөөдрийн хуралдаанаар Ө.Мэндбаярт холбогдох эрүүгийн хэргийг хянан хэлэлцээд түүнд анхан, давж заалдах, хяналтын шатны шүүхээс оногдуулсан цаазаар авах ялыг хэвээр үлдээсэн байна. Ө.Мэндбаяр нь 2009 оны 7 дугаар сарын 26-нд Завхан аймгийн Отгон сумын нутаг Буянт багт шалтгаангүйгээр иргэн Б-г буудаж гэмтэл учруулан, хамт амьдардаг авга ах М, түүний эхнэр Т нарынх нь дэргэд санаатай алсан гэмт хэргийг үйлджээ. Түүнчлэн долоон хүнийг буудаж, нэг хүний биед хүнд, хоёр хүний биед хүндэвтэр гэмтэл учруулан алахыг завдсан байна. Мөн иргэн Т-г мөр, нуруунд нь, иргэн Д-ийн толгой руу нь цохин хөнгөн гэмтэл учруулж,  иргэн Ж-гийн нохойны хөлийг буудах зэргээр зэвсэг хэрэглэж танхайрсан байна. Дээрх үйлдлээс айж иргэн Ж-ийн хот айлынхан бүгд зугтсан үед тэдний эд хөрөнгөө хамгаалж чадахгүй байдлыг далимдуулж, Ж-ийн гэрээс мөнгөн хазаар, суран хазаар, хязаалан насны гүүг булааж, 420 000 төгрөгийн хохирол учруулжээ. Үүнээс гадна иргэн М-ийг хүчиндэхийг завдсан, бага насны буюу 10 настай Б-г айлган, хүч хэрэглэн хүчиндсэн хэргийг тус тус үйлдсэн байна.