Налайх дүүргийн нүүрсний уурхайд нүүрс олборлогч иргэд амь насаа алдах явдал олонтаа гарч байна. Үүнтэй холбогдуулан Налайхын уурхайг хаах саналыг Нийслэлийн мэр­гэжлийн хяналтын газраас гаргаад байгаа аж. Учир нь аж ахуйн нэг­ж, иргэдийн нүүрс олборлож буй  бичил уурхайнууд стандартын шаардлага, аюулгүй байдлыг огт хангаагүйгээс хүний  амь  эрсдэж буйтай холбоотой. 

Тухайлбал энэ сарын 15-ны өдөр Налайх дүүргийн III хорооны нутаг дэвсгэр "Цагаан ташаа" ХХК-ийн талбайд осол гарч нүүрс олборлолт хийж байсан зургаан хүн амиа алдсан харамсалтай хэрэг гарсан юм.  НМХГ-ын хийсэн судалгаагаар сүүлийн долоон жилд 204 осол гарч, 99 иргэн амиа алдаж, 34 хүн хүндээр бэртэж, 71 хүн хөдөлмөрийн чадва­раа алдсан гэх тоо гарчээ. Түүнчлэн цаашид Налайхын уурхайн амуудад бэхэлгээ хийсэн ч нурах аюултай аж. Одоогийн байдлаар уурхайн гүнд гал гарсан нь төмөр зам нурах, өндөр хүчдэлийн шугамд нөлөөлөх аюултай тул хаах хүртэл арга хэмжээ авах шаардлагатай гэж мэргэжлийн байгууллага үзэж байна.