Улсын дуурь бүжгийн эрдмийн театрын уран бүтээлчид театрын өдрийг тохиолдуулан энэ сарын 26-нд Ж.Бизэ “Кармен” дуурийг тоглох гэж байна. Энэ өдөр симфони найрал хөгжмийг Америкийн нэрт удирдаач Жиндон Кэй удирдах бөгөөд тамхины үйлдвэрийн ажилчин цыган бүсгүй Карменд Ардын жүжигчин А.Долгор, Дон Хозед гавьяат жүжигчин Б.Дамдинсүрэн, Эскамило бухтай тулалдагчид гавьяат жүжигчин М.Болд, хилийн хулгайч Данкайрод соёлын тэргүүний ажилтан Ц.Баттөр, Ремендадод соёлын тэргүүний ажилтан Ч.Түмэндэмбэрэл, Цунигад Ч.Чинзориг, Моралест А.Сайнбаяр, Хозегийн сүйт бүсгүй Микаэла соёлын тэргүүний ажилтан Б.Эрдэнэтуяа, Мерседес-Ц.Ариунаа, Фраскита-Н.Туяа нар тоглох юм.

Эрх чөлөөт цыган хүүхэн, түүний хайр дурлалын тухай өгүүлдэг “Кармен” дуурь нь Францын зохиолч П.Меримегийн “Кармен хүүхэн” зохиолоос сэдэвлэн бүтээжээ. Хөгжмийн зохиолч Ж.Бизэгийн “Кармен” дуурийн анх 1875 онд Францын театрт тавьж байсан юм. Харин манай улсад анх 1984 оны дөрөвдүгээр сарын 5-нд тайзнаа тоглож байжээ.