Монголын оюутны спортын X Универсиад наадмын ширээний теннисний тэмцээн өнөөдөр Их Засаг их сургуулийн урд байрлах ширээний теннисний “Champion” клубт эхэллээ. Тэмцээнд ШУТИС, МУИС, МУБИС, ХААИС, ЭМШУИС, БХИС тэргүүтэй нийт 19 их, дээд сургуулийн эрэгтэй 50, эмэгтэй 32 тамирчин эрэгтэй, эмэгтэй ганцаарчилсан, холимог хосын төрөлд өрсөлдөж байна. Тамирчид эрэгтэй найм, эмэгтэй зургаан бүсэд хуваагдан хасагдах системээр өрсөлдөх юм.

Универсиадын ширээний теннисний тэмцээн маргааш өндөрлөх бөгөөд тэмцээнд амжилттай оролцсон тамирчдаас сонгож, ирэх наймдугаар сарын 12-23-ны хооронд БНХАУ-ын Шинжинь хотноо болох Дэлхийн оюутны зуны спортын XXVI  их наадамд оролцуулах юм.

Универсиад наадмын дараагийн тэмцээн болох аэробикийн тэмцээн энэ сарын 25, 26-нд ШУТИС-ийн спорт зааланд, харин гандболын тэмцээн 25-27-нд “Мон-Алтиус” Биеийн тамирын сургуулийн зааланд болно.