Монгол Улсын
Статистикийн тухай хуулинд Аж ахуйн нэгж байгууллагын тооллогыг  5 жилд нэг удаа явуулж байхаар заасны дагуу өмчийн бүх төрөлд хамрагдах аж ахуйн нэгжийн улсын тооллогыг 2011 оны
дөрөвдүгээр сарын 15-наас 2011 оны тавдугаар
сарын 15-нд багтаан явуулахаар болсон. Энэ хүрээнд Сангийн
сайд С.Баярцогтоор ахлуулсан
улсын хэмжээний аж ахуйн нэгж байгууллагын тооллогыг зохион байгуулах ажлын
хэсгийн анхдугаар хуралдаан өчигдөр болж, тооллогын
зорилго, үйл ажиллагаа, зохион байгуулалтын асуудлыг хэлэлцэж, тооллогыг зохион байгуулах
улсын комиссын ажиллах журам, гишүүдийн ажлын чиг үүргийг баталлаа.

Ажлын хэсгийн
ахлагч С.Баярцогт тооллогын бэлтгэл, гишүүдийн чиг үүрэг, ажиллах
журам, арга зааварчилгаа,
мэдээлэл сурталчилгааны талаар чиглэл өгч, гишүүдэд
тодорхой  үүрэг
даалгаварыг өглөө.  

Уг тооллого нь аж
ахуйн нэгжийн тоо хэмжээ, байршил, бүтцийг үнэн зөв тодорхойлж,
улс орны эдийн засаг, нийгмийн хөгжилд тэдний оруулж байгаа хувь нэмрийг бүрэн гүйцэд тооцох,
удирдлагын шийдвэр гаргахад шаардлагатай тоон мэдээллийг бүрдүүлэх, үйлдвэрлэл, үйлчилгээний
статистикийн бүрэн хэмжээний мэдээллийг бий болгож, улмаар статистикийн
судалгаа, шинжилгээ хийхэд чухал
ач холбогдолтой аж. Монгол Улс аж ахуйн нэгж байгууллагын тооллогыг анх 1991
онд хийж байсан бөгөөд түүнээс хойш 1994,1998, 2006 онуудад улс орон даяар явуулжээ. Ингэхдээ
2006 онд явуулсан тооллогод Монгол Улсын хэмжээнд үйл ажиллагаа
явуулж байгаа өмчийн
бүх хэвшлийн 34,8 мянган аж ахуйн нэгж, төсөвт болон төрийн бус
байгууллагаас гадна 52,9 мянган аж ахуйн нэгж байгууллагууд хамрагдаж байсан аж. Уг тооллогоос
хойш 5 жилийн хугацаанд аж ахуйн нэгж байгууллагын бүтэц, цар
хэмжээ, үйл ажиллагааны чиглэлд ихээхэн өөрчлөлт гарсан юм байна.

Г.Дарь