![](https://news.mn/wp-content/archive2/politics/photo/2011/3/79eb7e8e12995a69/c868539b47a904a1big.jpg)
Ядаж л сүүлийн үед Ардчилсан нам дотор МоАХ фракцийг дэмжих дэмжигчдийн тоо өдрөөс өдөрт идэвхжих болсон. Тус фракц Ардчилсан нам дахь бусад фракциудаасаа хамгийн идэвхтэй үйл ажиллагаа явуулахын зэрэгцээ, нам доторх ирээдүйтэй залуусыг ч татан оролцуулах бодлого баримталж байгаа аж. Харин нийслэлийн Ардчилсан намын дарга болох хүсэлтээ удаа дараагийн ярилцлагаараа илэрхийлж ирсэн Х.Тэмүүжин гишүүний тухайд “Нэг ардчилал“ клубын залуусын зүгээс тодорхой хэмжээний дэмжлэг бий. Гэсэн ч тэд З.Энхболд гишүүний тэргүүлдэг Ардчилсан хүчний холбоог дэмжиж, “Хамтарсан Засгийн газраас гарах цаг болсон“ гэх сүр дуулиантай мэдэгдлийг чангаар “хашгирч“ байсан ч санаандаа хүрээгүй. Иймд энэ удаад ч тэр нийслэлийн Ардчилсан намын даргаар өөрсдийн хүнийг тавих сонирхлоо шууд илэрхийлэх шаардлагагүй хэмээн үзсэн бололтой.
Түүнчлэн Ардчилсан намын Ерөнхий нарийн бичгийн дарга Д.Эрдэнбатыг өнгөрсөн хаврын Үндэсний зөвлөлдөх хорооны хурлаар өөрчилнө гэсэн яриа гарч байсан. Улмаар “Алтангадас“ фракцийн сонирхол гэдгээр тайлбарлагдаж байсан Д.Эрдэнэбат даргыг өөрчлөх сонирхол тухайн үед МҮДН-ий “угшил“-даа үнэнч үлдсэн цөөхөн хэдэн лидерүүдийнх нь эгдүүцлийг хүргэж байсан. Иймд “Алтангадас”, “Нэг ардчилал“, МоАХ тэргүүтэй Ардчилсан намын олон фракциуд УИХ-ын 2012 оны сонгуулийг хүртэл хэн хэнийхээ ашиг сонирхлоор тоглохгүй хэмээн тохиролцсон байна. Харин энэ дунд Засгийн газарт хоёр ч дэд сайдтай, ардчиллыг анхнаас нь дэмжиж ирснээрээ бахархдаг “Кроун“ бүлгийн басч болохгүй лидерүүдийн хувьд шүүмжлэлийг нийслэлийн Ардчилсан намын Зөвлөлдөх хорооны хурал дээр үргэлжлүүлэх бололтой. Тус фракцийн гишүүдийн санаачилж боловсруулсан Үндэсний зөвлөлдөх хорооны ротацийн сонгуулийг УИХ-ын 2012 оны сонгууль хүртэл дахин явуулахгүй болсон нь тэдний ийнхүү хатуухан шүүмжлэл өрнүүлэх шалтгаан болох аж. Ийнхүү Ардчилсан намын дарга Н.Алтанхуягийгаа өөрчлөх гээд өөрчилж чадаагүй тус намынхан энэ удаад нийслэлийн Ардчилсан намын даргыг ч өөрчилж чадахгүй нь тодорхой аж. Шалтгаан нь нийслэлийн Ардчилсан намын даргын суудлаар оролдох нь УИХ-ын 2012 оны сонгуулийн өмнө намын дотоод зөрчлийг хурцатгахгүй гэсэн тодорхой нэг үндэслэлээр тайлбарлагдах ажээ.
Тоймч Г.Отгонжаргал "Зохиогчийн эрх" Улс төрийн тойм