Төв, Сэлэнгэ аймгуудад уул уурхайн чиглэлээр үйл ажиллагаа эрхэлж буй иргэд, аж ахуйн нэгжүүдэд мөнгөн ус, химийн хорт бодисны хэрэглээ, шлам зэрэгт мэргэжлийн хяналт, шалгалт хийж, дүгнэлт гаргах зорилгоор Мэргэжлийн хяналтын ерөнхий газар, Байгаль орчин, аялал жуулчлалын яам, Цагдаагийн ерөнхий газраас хамтарсан ажлын хэсэг орон нутагт ажиллаж байна. Ажлын хэсгийнхэн Төв аймгийн Борнуур, Сүмбэр, Жаргалант сумдад ажиллаад, өнөөдрөөс Сэлэнгэ аймгийн Баруунхараа, Зүүнхараа сумдад очиж ажиллах юм. Тухайн орон нутагт хийсэн хяналт шалгалтын талаар Мэргэжлийн хяналтын ерөнхий газрын мэргэжилтэн н.Чинзоригоос тодрууллаа.-Хяналт шалгалт хаанаас эхлэв?
-Төв аймгийн Борнуур сумаас эхэлж, Сүмбэр, Жаргалант сумдад ажиллаад, яг одоо Сэлэнгэ аймгийн Баруунхараад ажиллаж байна. Тухайн орон нутагт мөнгөн ус, химийн хортой бодисын хэрэглээ байгаа эсэхийг тогтоох, уурхайн хууль бус шламуудыг зогсоох, өнгөрсөн жилд хийсэн үзлэг шалгалтын үр дүн ямар байгаад хяналт тавьж байгаа юм.
-Шалгалтын явцад Борнуур сумын нутагт нэгэн аж ахуйн нэгжээс мөнгөн ус илэрсэн гэх юм. Энэ үнэн үү?
-Төв аймгийн Борнуур сумын II багийн нутаг дэвсгэр дэх хувиараа алт олборлогчдын алтыг угаадаг “ХАМО” компанийн байранд хадгалж байсан 0.86 кг мөнгөн усыг илрүүлсэн. Тус компанийн лаборатори дотор хэд хэдэн газраас дээж авч шинжлэхэд мөнгөн усны найрлага байгаа нь тогтоогдсон. Мөн гадна хогийн саван дотор мөнгөлөг бөмбөлгүүд хаягдсан байсныг шинжилсэн. Ажлын хэсэг дээж авч, тусгай багажаар хэмжилт хийснээр мөнгөн ус мөн болохыг тогтоож, цагдаагийн газрын төлөөлөл эрүүгийн хэрэг үүсгэн шалгаж байна. “ХАМО” компанийн үйл ажиллагааг зогсоосон. Үзлэг шалгалтаар өөр бусад зөрчлүүд гарч байна. Тухайлбал, Төв аймгийн Жаргалант суманд чулуу буталж тээрэмддэг тээрмийг хурааж, лацадлаа.
-Сэлэнгэ аймгийн Түнхэлд хүн, мал химийн хорт бодис алдагдсанаас болж хордоод байна гэсэн мэдээлэл урьд өмнө нь яригдаж байсан. Тус газраар шалгалт хийх үү?
-Яг тэр газраар чинь очно. Өмнөх шалгалтаар Түнхэлд очиж, үзлэг шалгалт хийж, хөрс, уснаас нь дээж авч, шинжлэхэд мөнгөн ус биш, хүнцэл гэж бодис илэрсэн. Гэхдээ мөнгөн уснаас өөрцгүй хүний бие эрхтнийг гэмтээх шинж чанартай бодис шүү дээ. Ажлын хэсэг энэ долоо хоногт орон нутагт ажиллаад, ирэх долоо хоногт ажлын тайланг салбарын удирдлагуудад танилцуулах байх. Албан ёсны нэгдсэн дүн гарсны дараа олон нийтэд дэлгэрэнгүй мэдээлэл өгнө дөө.
