Фукушимагийн атомын цахилгаан станцад гарч байгаа түймэр одоо 4-р реакторыг нь сүйтгэж байна гэж эх сурвалжууд мэдээлж байгаа юм. Хэдийгээр энэ реактор нь газар хөдлөлтийн өмнө ажиллагаагаа зогсоосон байсан ч  цөмийн түлшний ихээхэн нөөц хадгалж байсан тул ийнхүү галд өртөн сүйдсэн нь нөхцөл байдлыг улам хүнд болгож байгаа аж. Газар хөдлөлтөөс хойш тус атомын цахилгаан станцад дөрвөн ч удаа дэлбэрэлт болж улмаар цацарг идэвхийн алдагдал нь хүний эрүүл мэндэд хохирол учруулах хэмжээнд очиж байгаа юм. Киодо агентлагаас мэдээлэхдээ цөмийн түлшний нөөцийн сан буцалж дэгдэн улмаар цацраг идэвхт бодис нэмж алдагдах түгшүүр нэмэгдэж байгаа аж. Харин тус атомын цахилгаан станцыг эзэмшигч Тепко компани цөмийн түлшний хуримтлал дэлбэрч цацраг идэвхт бодисын алдагдал нэмэгдэхээс   сэргийлэн түймэр унтраагч нисдэг тэргээр дээрээс нь ус цацахаар завдаж байгаа гэжээ.
Фукушимагийн атомын цахилгаан станц нь нийт зургаан реактортай бөгөөд 1 ба 3-р реакторууд нь өнгөрөгч бямба болон даваа гаригуудад дэлбэрч байсан бол өчигдөр 2-р реактор нь мөн дэлбэрч улмаар түймэр дэгдэн 4-р реакторын байгууламжинд эвдрэл учруулж байгаа юм байна. Дэлбэрч сүйдсэн гурван реакторын болон одоо хэзээ мөдгүй учрах нь тодорхой болсон 4-р реакторын дэлбэрэлтүүд нь устөрөгчийн хэт хуримтлал үүссэнээс шатлгаалсан гэж албаны эх сурвалжууд мэдээлжээ. Мөн албаны эх сурвалжуудын мэдээлж байгаагаар бол Токио хотоос 250 км зайтай орших Фукушимагийн станцын орчимд цацраг идэвхийн хэмжээ 400 рентген нэгжийн хэмжээнд хүрсэн байгаа гэнэ. Хэрэв энэ хэмжээ 1000 рентген нэгжид хүрвэл цацрагийн хордлогын түр хугацааны шинж тэмдгүүд болох бөөлжих, огилт өгөх шинж тэмдгүүд илэрдэг ажээ. Мөн 100 рентген нэгжийн хэмжээтэй цацрагийн тархалтаас эхлэн хавдраар өвчлөх эрсдэлийг нэмэгдүүлж байдаг юм байна. 1000 нэгжид хүрсэн тохиолдолд хүртэл хорт хавдрын эрсдлийг 5 хувь хүртэл нэмэгдүүлдэг байна. Харин 4000-5000 нэгжид хүрсэн бол хүнийг сарын дотор үхэлд хүргэдэг ажээ.

М.Наст