Газар хөдлөлт баасан гаригт Улаанбаатарын цагаар 14.46-д эхлэн бараг хоёр цаг үргэлжилсэн юм. Баасан гаригийн орой гэхэд зөвхөн Токиод 14 том үйлдвэрт түймэр гарсан байна. Хэд хэдэн атомын цахилгаан станц ослын зогсолт хийлээ. Дөрвөн сая орчим байшингийн цахилгаан тасарсан байлаа. Олон хот сууринд тээврийн ажиллагаа тасалдан Sony, Nissan, Toyota зэрэг корпорацийн үйлдвэрүүд зогссон байна.
Ерөнхий эдийн засгийн хохирлыг тооцоход хэдэн долоо хоног хэрэгтэй. Бүдүүвч тооцоо хийхэд ч хэд хоног шаардлагатайг шинжээчид хэлж буй.
Аливаа байгалийн гамшгийн үеэр эсвэл дараа нийгмийн хамарсан эмх замбараагүй байдал үүсч эдийн засгийн үзүүлэлтүүд унадаг. Дараагийн улиралд нь сэргээн босгох ажиллагааны үеэр хамгийн түрүүнд барилга байгууламжийн салбарын үзүүлэлт эрчимждэг байна. Сэргээн босголтод төсвийн зарлагыг эрс нэмэгдүүлэх, зээлийг эрчимжүүлэх шаардлага гарч ирнэ.
Энэ оны нэгдүгээр сарын тайлангаар Японы төсвийн алдагдлыг энэ сарын 31-нд төгсөх санхүүгийн жилд 9,1 хувь болно гэж чансааны S&P агентлаг гаргасан байв. Энэ их алдагдал дээр нэмэлт ачааалал ирэх нь зайлшгүй болж байна. Үүний зэрэгцээ тус орны дотоод ба гадаад өр 10 их наяд ам.доллар хүрээд байгаа нь дотоодын нийт бүтээгдэхүүний 200 орчим хувь болж байна. Энэ үзүүлэлтээр Япон хөгжиж байгаа орнуудаас “аварга” нь юм.
“Санхүүд нэн ялангуяа улсын сан хөмрөгт сэргээн босголтын зардал чухал. Жишээлбэл, Австралийн газар хөдлөлд сүйрсэн ганц хотын сэргээн босголт гэхэд л тус орны дотоодын нийт бүтээгдэхүүний 7-8 хувьтай тэнцэж байна. АНУ-ын Катрина шуурганы дараах сэргээн босголт нь ДНБ-ний нэг хувьтай тэнцсэн юм. Японы эдийн засагт энэ гамшгийн сэргээн босгох зардал нь харьцангүй багаар тусах байх. Гэхдээ л нэмэлт зардал Японд тааламжтай биш нь ойлгомжтой” гэж шинжээчид дүгнэжээ. Ерөнхий зураглал гарах цагаар зах зээл түүнтэй зохицон хөдөлнө. Одоогоор бол Японд тусламж хэрэгтэй нь л ойлгомжтой байна.
Мөн газар хөдлөлтийн хор уршигт төсвийн дарамт нэмэгдэхээс гадна хүн амын Засгийн газарт итгэх итгэл буурна. Канын Засгийн газрын чансаа доогуур байгаа билээ. Дунд хугацаанд эдийн засагт нь хүн амаас гадна гадны итгэл буурах аюул бий. Өнгөрсөн жилд Японы эдийн засгийн өсөлт 3,9 хувьтай байсан ч дөрөвдүгээр улиралд нь өмнөх улирлаасаа 0,3 хувийн уналттай байлаа. Иенийн ханш гамшгийн үеэр унасан ч түүнийг валют нь сул бол улсын байдал нь муу гэдгээр үзэж болохгүй. Эдийн засаг сулрахад иен бэхжиж, хувьцаа, түүхий эд, гадны хөрөнгө зэрэг хөрөнгө оруулалтын зам гарч ирэх үеэр суларч байсныг бид нэг биш удаа харж байсан билээ. Иен чангарч магадгүй өөр нэг шалтгаан нь Японы корпорациуд дэлхийд тархсан сүлжээтэй. Тэдний орлого төв үйлдвэртээ шилжин эвдэрсэн хүчин чадлаа сэргээхэд нь тус болох ёстой.
Хамгаалалтын валют гэдгээрээ иен унах магадлал бага. Японы ханш нь дэлхийн бусад мөнгөн тэмдэгтээс харьцангүй бага. Японы корпорациуд нь АНУ, Европын түншүүдийнхээ дэргэд бэлэн мөнгөтэй бөгөөд зээл авдаггүй. Хэрэгтэй гэж үзвэл тэр үнэт цаасны хадгаламжаа эргэлтэд оруулна. Иен удалгүй чангарна гэх бас нэг шалтгаан нь мөнгө зээлийн бодлогоо зөөллөх боломж Японд байгаа. Тэд үүнийг Австралийн үер, Шинэ Зеландын газар хөдлөлтөөр туршаад амжсан билээ. Тиймээс Төв банк нь зах зээл ба банкны хэвийн ажиллагааг хангахад чиглэгдсэн бодлого явуулах боломжтой. Иен чангарах нь тус орны суларсан эдийн засагт нэмэлт ачаалал болно. Эх орных нь бүтээгдэхүүний өрсөлдөх чадвар сулрахад улс орных нь импорт төдий чинээ хямдарна.