Гадаад харилцааны яамны Төрийн захиргааны удирдлагын газрын дэд дарга С.Сүхболд мэдээлэл хийлээ.ГХЯ нь хариуцлагатай жижүүр томилуулан ажиллуулж байна. Өчигдөр болон өнөөдөр жижүүрт гарсан бүрэлдэхүүн бүртгэлийн ажиллагаа явуулж, одоогийн байдлаар Японд байгаа 1332 иргэний байршжил, утасыг болон тэд нарын нөхцөл байдлын талаар ар гэрийнхнийх нь тусламжтайгаар тодруулж бэлэн болгоод байна.
Мөн Засгийн газарт асуудал тавьж, хандивын ажиллагаа зохион байгуулах тухай уриалга гаргаж, төрийн албан хаагчдыг нэг өдрийн цалингаа хандивлахыг уриаллаа. ГХЯ хандивын албан ёсны гурван данс нээсэн. “Монгол 999” нэгдэл 20 сая төгрөгийн ноолууран бүтээгдэхүүн хандивлахаа мэдэгдсэн гэх зэрэг олон компани хандаж эхлээд байна.
МИАТ-ийн онгоцоор Монголын 153 иргэн Наритагаас хөөрөхөд бэлэн болоод байгаа. Нэмж онгоц гаргах асуудлаар ЗТБХБ-ын сайд Х.Баттулга мэдээлэл өгөх байх. ГХЯ-ны www.mfat.gov.mn сайт мэдээллээр байнга шинэчлэгдэж байгаа. Японд буй 4700 иргэнээс Япон дахь ЭСЯ-нд ирсэн мэдээллээр манай иргэд бэртсэн, эндсэн гэх мэдээлэл байхгүй байна.
