Сүүлийн үед хэд хэдэн телевизийн эфирээр цацсан Д.Сүхбаатар жанжны тухай өгүүлсэн “Үнэн түүх” хэмээх нэвтрүүлэг нь МАН-ын нэр хүндийг гутаах гэсэн оролдлоготой нэвтрүүлэг болсон гэж үзээд МАН-ынхан 90 жилийнхээ ойн өдөр үзэсгэлэн гаргахаар болжээ. Уг үзэсгэлэнд Д.Сүхбаатар жанжны МАН-ын архивт хадгалагдаж үлдсэн түүх болон МАН-аас МАХН, МАХН-аас МАН хүртэл архивын баримт дэлгэн тавих гэнэ.

Өнгөрсөн 2008 оны парламентийн сонгуулийн дүнгээс үүдэн дэгдсэн долдугаар сарын 1-ний улс төрийн үймээний үед МАХН-ын байр шатахад намын байрны архивт байсан 1990 оноос өмнөх түүхийн баримт сэлт шатсан хэмээн тухайн үеийн МАХН-ын дарга асан С.Баяр хэлж байсан билээ. Тиймээс МАН-ын үзэсгэлэн гаргахад түүхийн барим сэлт хангалттай байх эсэх талаар МАН-ын нарийн бичгийн дарга Ц.Сүхбаатараас тодруулахад, 2008 оны долдугаар сарын 1-ний өдөр 1990 оноос сүүлд архивлагдсан зарим нэг цөөхөн баримт галд өртсөн ч нөхөн сэргээсэн тул ямар ч баримт дутахгүй гэлээ.