Израйлын хөлбөмбөгийн холбоо шигшээ багийнхаа босс Луйс Фэрнандэсыг үүрэгт ажлаас түр түтгэлзүүлж байгаа талаар мэдэгдсэн байна. Өмнөх багтаа ажиллаж байхдаа хийж байсан дүрмийн бус үйлдлийг нь ФИФА илрүүлсэн учраас түүнд шийтгэл оноож магадгүй байна. Дэлхийн хөлбөмбөгийн удирдах газар Фэрнандэсыг Катарын Ал Райан багт 400 мянган еврогийн өртэй гэдгийг илрүүлжээ. Тэрээр тус багт ажиллаж байгаад гэрээгээ зөрчин Израйлын Вейтар Иерусалемь баг руу 2005 онд очиж байсан байна.

Израйлын хөлбөмбөгийн холбоо Фэрнандэсыг 3-р сарын 4-ы дотор Катарын багтай тооцоогоо дуусга гэж сануулга өгсөн байна. Харин ФИФА аль хэдийнэ шийдвэрээ гаргачихжээ.  Испанид төрсөн Франц мэргэжилтэн энэ талаар “Өнгөрсөн 7 хоногт энэ талаар сонссон. Харин ийм хурдан ФИФА-н шийдвэр гарсан нь хэцүү л байна. Учир нь манай баг одоо чухал үедээ ирээд байна. Бид Латви, Гүржтэй тоглолт хийнэ. Бид 2-ууланг нь хожиж 6 оноо авах хэрэгтэй байгаа. Женевт болох хурлаас миний цаашид ажиллах эсэх шийдэгдэнэ” гэсэн байна. Израйлын шигшээ Евро 2012-н урьдчилсан шатанд энэ сарын сүүлээр Латви, Гүржийн багуудтай Тел Авив хотноо тоглоно.