-Хэлэлцүүлгийн гол зорилго юу вэ. Хичнээн хүн оролцох бол?
-“Монголын үнэ цэнэ ба Б.Хурц” сэдэвт нээлттэй хэлэлцүүлгийг манай “Иргэдийн шударга шүүх” ТББ-аас санаачлан маргааш /өнөөдөр/ 15.00 цагаас “Нээлттэй нийгэм форум”-ын хурлын зааланд зохион байгуулна. Гол зорилгыг та бүхэн мэдэх байх. Англичууд манай улсын иргэн Б.Хурцыг яагаад баривчлах болов. Аль эрт 2003 онд болсон үйл явдалтай холбогдуулан түүнийг 2010 онд саатуулсан нь цаг хугацааны хувьд маш эргэлзээтэй. Өмнөх жилүүдэд баривчилж болох байсан шүү дээ. Гэтэл түүнийг өндөр албан тушаал хашиж байгаа яг энэ цаг үе мөн тус улс манайхтай Уул уурхайн салбарт томоохон хөрөнгө оруулалт хийх гэсэн цаг үетэй давхцаж байгаа нь ашиг сонирхлын зөрчил гэж хардахаас аргагүйд хүргэж байна. Саяхан Б.Хурцын асуудлыг Лондонгийн шүүх хянан хэлэлцээд Германы талд шилжүүлэх шийдвэр гаргалаа. Энэ нь Монгол Улсыг хэт дорд үзсэн, басамжилсан, өндөр албан тушаалтныг доромжилсон шийдвэр гаргалаа гэж бид үзэж байгаа. Тиймээс олон нийтийн дунд нээлттэй хэлэлцүүлэг зохион явуулах боллоо.
-Б.Хурцын асуудлаарх хэлэлцүүлэгт Английн Элчин сайдын яамнаас төлөөлөл оролцох уу?
-Улс төр менежментийн академи, Чингисийн Монголын залуучуудын холбоо. Монголын чөлөөт хуульч, өмгөөлөгчдийн холбоо болон манай “Иргэдийн шударга шүүх” ТББ хамтран дээрх хэлэлцүүлэгт Их Британийн Умард Ирландын Вант Улсаас Монгол Улсад суугаа Онц бөгөөд бүрэн эрхт Элчин сайд, хатагтай Торда Абботт-Воттыг оролцохыг хүссэн урилгыг өнгөрсөн хоёрдугаар сарын 23-ны өдөр хүргүүлсэн. Ямар ч байсан бидний урилгыг хүлээн авсан. Хариу ирүүлээгүй байна.
-Та бүхэн Б.Хурцын асуудлаар байгуулагдсан ажлын хэсгийнхнээс хэлэлцүүлэгт оролцох санал тавьсан уу?
-Энэ хэлэлцүүлэгт хэн ч орж болно. Нээлттэй. Хуульзүйн яам, Гадаад Харилцааны яамнаас байгуулагдсан ажлын хэсгийнхэнд урилга өгөөгүй. Тэд оролцож иргэдтэй санал бодлоо хуваалцвал сайн байна шүү дээ. Хэлэлцүүлгийг нэг удаа зохион байгуулаад өнгөрөхгүй. Цаашид ч үргэлжлэх юм.
-Английн Элчин сайдын яамнынхан Б.Хурцын талаар албан ёсны мэдээлэл хийх ёстой гэсэн утгатай шаардах бичгийг та нар хүргүүлсэн.Шаардах бичгийн хариу ирсэн үү?
-Английн Элчин сайд хатагтай Торда Абботт-Воттыг албан ёсны тайлбар мэдээлэл өгөхийг хүссэн шаардах бичгийг өнгөрсөн хоёрдугаар сарын 23-ны өдөр “Иргэдийн Шудрага Шүүх” ТББ-аас хүргүүлсэн. Бидний илгээсэн шаардах бичгийн хариуг Их Британийн Элчин сайдын яамнаас манайд ирүүлсэн. Элчин сайд хариу албан бичигт дурдахдаа “ Б.Хурцын асуудлаар тодорхой тайлбар өгөх боломжгүй. Учир нь тэрбээр анхан шатны шүүхийн шийдвэрийг давж заалдах хүсэлтээ Английн шүүхэд гаргасан билээ. Шүүх ажиллагаа дуусаагүй. Монгол Улсын иргэн Б.Хурцыг баривчилсан нь манай хоёр улсын дипломат болон худалдааны харилцаатай ямар ч холбоогүй болохыг маш итгэлтэй батлан хэлье гэсэн хариулт өгнө лээ.
Н.Түвшин