Дэлхийн шилдэг 12 эмэгтэй шатарчны оролцож буй Катарын гран-при тэмцээний найм дахь өргийн тоглолтууд өчигдөр боллоо. Дэлхийн шилдгүүдтэй мөр зэрэгцэн оюун ухаанаа уралдуулж буй Монголын их мастер Б.Мөнгөнтуулын тухайд өчигдөр Эквадорын шатарчин Марта Фрьерротой хараар тоглож, хожигдсон байна. Долоон өргийн дараах байдлаар хоёр хожил, нэг тэнцээ, дөрвөн хожигдолтой есдүгээрт эрэмбэлэгдээд байсан бол өчигдрийн өрөгт хожигдсоноор 11 дүгээр байр руу ухарлаа. Өнгөрсөн намар Улаанбаатар хотноо FIDE-гийн эмэгтэй шатарчдын гран-при тэмцээний тав дахь цувралд 11 дүгээр байрт бичигдэж байсан Б.Мөнгөнтуул өнөөдөр тэмцээний ес дэх тоглолтоо Шведийн их мастер Пия Крамлиний эсрэг хийх юм.

Найман өргийн дараачаар Армяны их мастер Елина Даниельян зургаа хожиж, нэг тэнцэж, нэг хожигдсоноор 6,5 оноотой тэмцээнийг тэргүүлж байна. Нийт 40 мянган еврогийн шагналын сантай Катарын гран-при тэмцээн бямба гаригт өндөрлөнө.