Замын цагдаагийн газраас зохион байгуулж буй "Өдөр бүр нээлттэй" өдөрлөг маргааш болно. Энэ үеэр иргэд Замын цагдаагийн албаны үйл ажиллагаа, үйлчилгээтэй холбоотой санал хүсэлтээ тавьж, өөрийн сонирхсон асуултад хариулт авах боломжтой юм байна. Мөн иргэн та өөрөө ирж амжихгүй бол www.trafficpolice.gov.mn, www.stop.mn гэсэн вэб хуудсаар дамжуулж мэдээлэл авахаас гадна Авто радио 96.3 радиогийн 96009393 дугаарын утсаар холбогдож болох гэнэ.Энэ өдөр иргэдэд зориулан бүх төрлийн мэдээлэл, лавлагаа өгөхөөс гадна жолооны үнэмлэхний эрх сэргээх шалгалт авч, тэнцсэн тохиолдолд үнэмлэхийг нь шууд өгөх юм байна. Шалгалтад орох иргэдийн эрх хасуулсан хугацаа нь дууссан байх ёстойгоос гадна эрүүл мэндийн үзлэгт орж тэнцсэн хуудас, өргөдөл зэргийг бүрдүүлж шалгалтад орох ажээ.Мөн Замын хөдөлгөөний удирдлагын төвийн үйл ажиллагаатай танилцах боломжийг иргэн  танд олгох ажээ. “Өдөр бүр нээлттэй” өдөрлөг 09.00 – 15:00 цагийн хооронд үргэлжлэх юм.