-Юуны өмнө танай хамт олонд “Улсын хошой аварга” болж, аймгийн “Шилдэг аж ахуйн нэгж”-ээр шалгарсанд баяр хүргэе. Амжилтаасаа хуваалцахгүй юу?
-2010 он манай “Баяндулаан-Уул” ХХК-ийн хувьд их үр өгөөжтэй жил байлаа. Бүтээн байгуулалтын хувьд ч, газар тариалангийн үйлдвэрлэлийн хувьд ч нэлээд үр дүнтэй сайн ажилласан гэж үзэж байгаа. Бид 2010 онд 225 ажлын байр шинээр бий болгосон. Энэ үзүүлэлтээрээ аймгийн “Шилдэг аж ахуйн” нэгжээр тодорсондоо баяртай байгаа.
Манай компани 2010 онд олон улсын стандартыг хангасан, сүүлийн үеийн шилдэг технологитой иж бүрэн махны үйлдвэр ашиглалтад оруулсан. Мөн газар тариалангийн үйлдвэрлэлдээ аймгийн дунджаас дээш (га-гаас 18 цн) ургац авсан үзүүлэлттэй ажиллалаа. Үүний зэрэгцээ мах, сүүний чиглэлийн үхэр үржүүлэх ажил зохион байгуулж, махны чиглэлийн хонийг цэврээр нь гаргаж авах үр хөврөл суулгах ажлыг сая арваннэгдүгээр сард амжилттай хийж гүйцэтгэлээ. Нийтдээ 1000 гаруй хонинд цэвэр үүлдрийн үр суулгасан. Мөн энэ жилийн хувьд бид Цагааннуур суманд 35000 тн улаан буудай цэвэрлэх, хадгалах, хатаах иж бүрэн систем ашиглалтад оруулсан. Цаашдаа ер нь байгалийн эрсдэлийг яаж бууруулах вэ гэдэг дээр анхаарч ажиллана. Цагааннуурт 1500 га-д усалгаатай тариалан эрхэлж байгаа. Үүнийгээ цаашид нэмэгдүүлж 5000 га болгох зорилготой байна.
-Махны үйлдвэрийнхээ талаар тодруулаач?
-Манайх олон улсын стандарт буюу хүнсний аюулгүй байдалд тавигдсан хамгийн өндөр чанарыг хангасан үйлдвэр. Онцлог нь махыг гулуузаар нь биш пакетлаад, эцсийн бүтээгдэхүүн болгохоор ажиллаж байна. Бидний эхний зорилго бол дотоодынхоо хэрэгцээг бүрэн хангахад оршиж байгаа. Энэ зорилгоо биелүүлсэн тохиолдолд экспортын асуудал яригдах болно. Гэхдээ бид дотоодынхоо хэрэгцээг хамгийн түрүүнд хангах зорилтоо биелүүлнэ. Ингэхийн тулд хүмүүс ямар хэрэгцээг шаардаж байна, түүний дагуу л үйлдвэрлэлээ явуулна. Тухайлбал, хүмүүс гуяны мах авмаар байна уу, эсвэл хавирга, нуруу авмаар байна уу гэдгийг үндэслээд түүний дагуу жижиглэн пакетлаад савлаж гаргана.
-Танай компани маш их зүйлийг шинээр хийсэн харагдана. Дөрвөн давхар том барилга, техникийн агуулах гээд. Энд халуун хүйтэн ус, бохирын асуудал гээд нэлээдгүй зүйлийг шийдсэн байх. Хөдөөгийн тал нутагт Улаанбаатараас дутахааргүй тохилог сууна гэдэг үлгэрийн юм шиг санагдах байх л даа. Үүнийг та бүхэн хийж чаджээ?
-Энэ жилийн хувьд “Гачуурт” ХХК-ийн Газар тариалан, МАА-н салбар Сэлэнгэ аймгийн таван суманд үйл ажиллагаагаа явуулж байна. Нийтдээ 450-иад ажилчидтай. Бид ажилчдынхаа ажиллах нөхцөлийг бүрэн дүүрэн хангаж өгөхийн зэрэгцээ хөдөлмөр аюулгүйн байдлыг гүйцэд шийдвэрлэж чадсан. Энэ ажил маань маш их үр дүнгээ өгсөн. Бид ажилчдынхаа амьдрах орон сууцыг барьж өглөө. Мөн хооллох тохитой байрыг ч бэлдэж өгсөн. Дээр нь хөдөлмөр хамгааллын тал дээр нэлээд ажлуудыг хийсэн. Газар тариалангийн үйлдвэрлэлд зөвхөн техник бариад явна гэвэл өрөөсгөл ойлголт. Цаана нь янз бүрийн химийн гаралтай грибцидүүд хэрэглэдэг. Энэ бодисууд маань тухайн хүнд ямар нэгэн нөлөө үзүүлэхгүй байх үүднээс хөдөлмөр хамгааллын асуудлыг шийдвэрлэдэг. 2010 оныг бид компанийнхаа хэмжээнд хөдөлмөр хамгааллын жил болгон зарлаж ажилчдынхаа өвөл, зуны хувцас, ажлын багаж хэрэгсэл гээд нэлээдгүй зүйлүүдийг шийдвэрлэж амжсан. Зөвхөн энэ ажилд л 100-гаад сая төгрөг зарцуулсан байна.
-Таны хувьд газар тариалангийн томоохон компанийг удирдаад явж байхад гол анхаарах асуудал байна?
-Бидний хамгийн гол анхаарч байгаа зүйл бол техник хадгалалт. Гаднаас орж ирж байгаа өндөр өртөгтэй техникүүдийг гадаа тавиад байж болохгүй шүү дээ. Иймээс дулаан граж барьж түүний халаалтын асуудлыг шийдвэрлэсэн. Дээр нь уурын зуух хийж чадсан. Хэрэв Зэлтэрийн “Улаан-Овоо”-гийн нүүрсний уурхай бүрэн ашиглалтад орвол бидний эрчим хүчний нөөцийн асуудал бүрэн шийдэгдэнэ.
Ер нь газар тариалангийн үйлдвэрлэл маш эрсдэлтэйд тооцогддог. Иймээс бид газар тариалангийн үйлдвэрлэл эрхэлж байсан хөдөлмөрийн баатар, олон гавьяатынхаа үгийг сонсдог. Тухайлбал, Монгол Улсын хөдөлмөрийн баатар Авирмэд гуай байна. Дээр нь манай компанийн гол зарчим бол аль болох л хүнийг зөв урамшуулах системийг ашигладаг. Мөн хүмүүсийг сургах асуудал хамгаас чухал зүйл. Чадварлаг хүнээс хөдөлмөрийн бүтээмж ундардаг. Бид одоогоор хуучин САА-д ажиллаж байсан туршлагатай техникч, операторуудыг түшиглэж, тэдний ажлын туршлагаас суралцаж байна. Шинээр гарч ирж байгаа хүмүүс тэдний хэмжээнд хүрч ажиллаж хараахан чадахгүй байгаа. Иймээс байгаа энэ хүмүүсээ яаж чадварлаг сайн ажиллуулах вэ гэдэг дээр өөрийнхөө бололцоог дайчлан явж байна даа.
Бид энэ жилээс сургалтаа эхэлсэн. Манайх АНУ-ын “Жондери” компанийн албан ёсны деллер. Тэр хүрээндээ Дархан-Уул аймагт МСҮТ байгуулахаар сургуулийнхаа барилгын ажлыг энэ жил дуусгасан. Ирэх жил үйл ажиллагаагаа эхэлнэ. Эндээ ХАА, газар тариалан, мал аж ахуйн бүх нарийн мэргэжлийн чиглэлээр хүмүүсээ сургах зорилттой. Бид ХААИС-тай хамтарч ажилладаг. Эндээс жил бүр олон тооны оюутан сурагчдийг авч дадлагажуулан, сургадаг.
Бидний гол зорилго бол Монгол Улсын хэмжээнд ХАА, МАА, газар тариалангийн үйлдвэрлэлийн хөгжил болоод техникийн дэвшил ийм түвшинд хүрэх юм шүү гэдгийг ойлгуулж, загвар аж ахуйн маягаар юм хийж байгаа маань энэ. Өнгөрсөн хавар, намрын сургалтад 20-н оюутан авсан. Оюутнууд яг газар дээр нь ХАА-н үйлдвэрлэл, шинэ технологи гэж ийм байдаг юм байна гэдгийг нүдээрээ харж, ойлгож авдаг. ХААИС-ийн багш Мөнхбат бидэнтэй байнга хамтарч ажилладагт талархах хэрэгтэй.
-Танайх хамт олноороо төдийгүй, дотроос тань “Улсын аварга” төрлөө. Таны хувьд сэтгэгдэл маш өндөр байгаа байх. Цаашид энэ ХААГТ-гийн үйлдвэрлэлээ хэрхэн төсөөлж байна даа?
-Энэ жилийн хувьд бид их бахархалтай байна. Монгол Улсын “Тэргүүний тариаланч хамт олон” цолыг хоёр дахь удаагаа авлаа. Манай техникч Сахилтын Баатар өөрийнхөө хөдөө аж ахуйд гаргасан амжилтаараа “Улсын аварга” тариаланч боллоо. Ингээд хоёр улсын аваргатай болсондоо баяртай байна. Баатар маань удам дамжсан хөдөлмөрийн аварга хүн. Хөдөө аж ахуйн салбарт олон жил зүтгэсэн. Шинэ техник технологи нэвтрүүлэхэд өөрийнхөө ур чадвар, авьяасаа гаргаж, үр бүтээлтэй ажиллаж, түүнд зохицсон хэмжээгээр үйл ажиллагаагаа явуулж чаддаг ийм л хүн. Баатарын аав Сахилт гуай бол 1975 онд улсын аварга малчин болж байсан юм билээ. Ингээд удмаараа Улсын аварга цолтон болж яваад бахархаж байгаа.
С.Баяр сайдын эхлүүлсэн Атрын III аян бол Монгол Улсын газар тариаланд маш том дэмжлэг болсон. Цаашид үргэлжлээсэй гэж бодож байна. Дээр нь ХАА-н техникийн шинэчлэл, улаанбуудайн урамшуулал зэрэг нь газар тариалангийн үйлдвэрлэлд ихээхэн дэм үзүүллээ. Энэ жилийн хувьд ОХУ, Казахстан ургацынхаа тодорхой хэмжээг алдаад, улаанбуудайгаа зарахгүй гэсэн хориг тавьсан шүү дээ. Ийм үед манай компани ургац алдаагүй.
Бидний хувьд зөвхөн улаанбуудай биш, төмс, хүнсний ногоогоороо дотоодынхоо хэрэгцээг 100 хувь хангаж чадаж байна. Бидний хөдөлмөр тодорхой хэмжээгээр эрсдэл хүлээж, тодорхой хэмжээгээр алдагдалд ордог. Монгол Улсын хувьд хур борооны хэмжээ бага, ер нь сүүлийн үед дэлхийд дулаарал ихээхэн явагдаж байгаа энэ үед их анхааралтай ажиллах хэрэгтэй. Энэ байдал тариа ургалтад их нөлөөлнө. Ийм учраас бид эртнээс бэлтгэлтэй байж, техник технологио шинэчилж, ургац алдахгүй байх боломжийг бүрдүүлэх ёстой.
-ХАА-н үйлвэрлэлд ажилладаг хүмүүс маань цаг наргүй хөдөлмөр эрхэлдэг. Ар гэрийн асуудлаа хэрхэн зохицуулж байна даа?
-Хоёр хүүхэдтэй. Том нь гурван настай, бага нь нэг настай. Гэр бүлийн маань хүн хотод амьдарч байгаа. Бид чинь ар гэртээ бага харагддаг хүмүүс шүү дээ.
-Үнэхээр газар тариалангийн үйлдвэрлэлд танай компани ноёрхож байна. Цаашид юу хийхээр төлөвлөөд байна?
-Манай “Гачуурт” ХХК-ийн “Баяндулаан-Уул” ХХК бол газар тариалан, мал аж ахуйн хамгийн том салбар. Баяндулаан-Уулчууд бид “Монгол Улсынхаа хүнсний аюулгүй байдлын төлөө зүтгэе” гэсэн уриатай ажилладаг. Энэ уриагаа үргэлж бодож, биелүүлж явдаг. Энэ ч утгаараа биднийг төр засаг маань үнэлж Монгол Улсын аварга цолоор хоёр удаа шагналаа. Цаашид бидэнд хийх ажил их байна. Бид газар тариалангийнхаа бусад компанитай байнга хамтарч ажилладаг. Бид шинэ техник, технологийг оруулж ирээд өөрсдөө хүртэхдээ гол нь биш. Бусдад үлгэр жишээ үзүүлж, туршлагаа хуваалцахад гол анхаарлаа чиглүүлэн ажилладаг.
Ер нь газар тариалан, ХАА-н үйлдвэрлэл цаашдаа фермерийн систем руу чиглэгдэх болно. “Гачуурт” ХХК гэхээр учиргүй газар тариалангийн үйлдвэрлэлд монополь болоод байна гэж шүүмжлээд байдаг. Бидний хувьд аль болох сайн ажиллаж байгаа хүмүүстээ газраа хувааж өгөөд фермерийн системд оруулна гэсэн бодлого баримталж байгаа. Ингэхээр иргэд маань фермерийн системээр ажлаа хийгээд хүнсний үйлдвэрлэлээ тогтвортой хангаад явна шүү дээ. Нэг сайн техникчид 400-500 га талбай, нэг трактор, бүх агергатуудыг нь таслаад өгчихнө. Ингэхээр тэр хүн маань өөрийнхөө гэр бүлийн хүрээнд насан туршийнхаа бизнесийг эрхлээд явна гэсэн үг. Одоо хамгийн гол нь газар хувьчлалын асуудлыг л хүлээж байна. Энэ асуудал шийдэгдчихвэл хүмүүстээ газраа хувааж өгөөд энэ системээр ажиллана гэсэн зорилготой байгаа. Энэ бол хамгийн зөв систем гэж боддог.
Нэг эмзэглүүлсэн асуудал гараад байгаа. Энэ бол ХАА-н техникийг гадаадаас оруулж ирэхэд авдаг гаалийн татвар тэглэсэн байсан. Гэтэл 2011 оны 12 сар гэхэд болих гэж байгаа юм билээ. Үүнийгээ зогсоолгүй үргэлжлүүлэх юм бол монголчууд гадаадаас оруулж ирэх техникээ улам ихэсгэж, тэр хэмжээгээрээ Монголын газар тариалан улам хөгжих болно.
Цаашдаа 2011 онд мах, сүүний чиглэлийн үхэр, мөн газар тариалангийн үйлдвэрлэлээс гарч байгаа бүтээгдэхүүндээ тулгуурлаад тэжээлийн үйлдвэр, мах, сүүний чиглэлийн үхэр бордох цех, сүүний ферм байгуулах зорилт тавиад ажиллаж байна. Мөн манай компани цаашид нэмж 3000 га талбайг усжуулах бодолтой ажиллаж байна.
-Сүүлийн асуултыг танд үлдээе?
-Бидний ажлыг дэмжиж хамтарч ажилладаг, бидний гол худалдан авагч “Алтан тариа” ХХК, Тариалан эрхлэлтийг дэмжих сандаа маш их баярлаж явдаг. Эд нар маань дотоодынхоо үйлдвэрлэлийг дэмжигчид. Үнэхээр Монголын газар тариаланг хөл дээрээ босоход маш их хүч чармайлт гаргасан. Бид чинь үйлдвэрлэхээсээ гадна борлуулалтын асуудалд давхар анхаарал тавьдаг. Энэ асуудалд эд маань маш их хүчин зүтгэсэн. Ингээд “Алтан тариа” ХХК-ийн захирал н.Цэнгүүн, Бизнес хөгжлийн хэлтсийн дарга н.Ганзориг, “Буудай” сангийн хамт олондоо баярлаж талархсанаа илэрхийлж, эрүүл энх сайн сайхан бүхнийг ерөөн, ажлын өндөр амжилт хүсье.