Өнөөдөр Ардчилсан холбоо албан ёсоор анх хуралдсан цагаас хойш 21 жилийн ойн өдөр тохиож байгаа аж. Ардчилсан холбооны үүсэл нь анх 1989 оны 11 дүгээр сарын 27-оос 29-ны өдөр Улаанбаатар хотод болсон Залуу уран бүтээлчдийн хоёрдугаар зөвлөгөөний индрээс МАХН-ын Төв хорооны Улс төрийн товчоонд өргөх бичиг барьсанаар эхэлж байсан аж.

Ардчилсан холбооны анхны зохицуулагчаар С.Зориг агсан ажиллаж байсан аж. Харин 1990 оны Хоёрдугаар сарын 18-нд МоАХ-ны анхдугаар Их Хурал Монголын Үйлдвэрчний эвлэлийн Соёлын төв ордонд хуралдаж хот хөдөөгийн 611, гадаадын 200 гаруй төлөөлөгч оролцож байжээ. Энэхүү хурлаас МоАХ-ны ерөнхий зохицуулах зөвлөлийг нийт 35, тэргүүлэгчдийг 9 хүний бүрэлдэхүүнтэй байгуулсан байна.

Энэ хурлаараа МоАХ-ны гишүүд МАХН-ын төв хорооны Улс төрийн товчоог бүрэн бүрэлдэхүүнээрээ огцрохыг шаардаж анхны чөлөөт хэвлэл болох “Шинэ толь” хэмээх сонин хэвлэгдэн гарсан түүхтэй аж. Ийнхүү Ардчилалын алтан хараацай С.Зориг агсны хамгийн анх тэргүүлж байсан МоАХ үүсэн байгуулагдаж анх хуралдсаны 21 жилийн ойн өдөр тохиож байна.