Монголын сагсан бөмбөгийн холбооны “Ниссан” премьер лигийн нэгдүгээр
тойргийн ээлжит тоглолтууд боллоо. Лигийн отгон баг болох “Сүлд” спорт
хорооны “Офицерууд” энэ удаа гавьяат дасгалжуулагч Ц.Цэвэрбалын
удирдуулсан “Ирвэс”-ийн эсрэг тоглож 90:75-аар буулган авчээ. Энэ нь
тэдний хоёр дахь хожил бөгөөд багийн гол довтлогч Б.Мөнхбаяр 22 оноо
авсан байна. Харин хоёр дахь тоглолт америк лигионеруудыг эгнээндээ
нэгтгэсэн “Ав-Атар” болон “TLG-13” багийн хоорондын тулаанд шинэ цэргүүд
ялалт байгуулав. Эхний гурван үед эн тэнцүү өрсөлдсөн ч “Ав-Атар”-ууд
төгсгөлийг гайхалтай хийж 82:54-өөр илт давуу хожсон юм.

Нээлтийн
тоглолтод бэртэл авсан “Ав-Атар”-ын довтлогч С.Пүрэвцэрэн талбайдаа
эргэн ирсэн ч төгсгөлд дахин хөнгөн бэртэл авснаар сэлгээний суудалд
тухлав. Энэ тоглолтод “Ав-Атар”-ын тоглогчид жигд тоглолт үзүүлсний
ачаар ээлжит хожлоо авсан гэхэд болно. Харин “TLG-13” америк лигеонер
Девоны тоглолт төдий л харагдахгүй байв. Тэрээр багийнхантайгаа болон
орчин тойрондоо дасаж амжаагүй байгаа нь харагдсан. Өнгөрсөн жилийн
аварга “Хасны хүлгүүд” өөрсдийн гол өрсөлдөгч “Харцага”-тай тоглож
77:68-аар хожигдлоо. Энэ нь тэдний анхны хожигдол байв. Нэг хэсэг нам
гүм байсан “Баганат Өргөө”-гийн довтлогч Ц.Мэргэн энэ жилээс эхлэн
“Харцага”-уудын бүрэлдэхүүнд тоглож байгаа бөгөөд багийнхаа хожилд чухал
үүрэг гүйцэтгэсэн тэрээр 18 оноо авчээ. “Хүлгүүд”-ээс М.Отгонмөнх 25,
О.Ууганбаяр 14, Б.Мөнхболд 11 оноо авсан ч энэ нь багийн хожилд
хангалттай байсангүй.