МоАХ-г байгуулахад гар бие оролцон, таваргаж явсан товаришууд өнгөрсөн баасан гаригт Ардчиллын ордонд цугларч, 1999 оны хоёрдугаар сарын 18-ны өдрийг дурсав. Улсын баатар, УИХ-ын гишүүн Э.Бат-Үүл, Төрийн шагналт жүжигчин Д.Сосорбарам, Тагнуулын ерөнхий газрын дарга асан Т.Билэгт, Дарь Сүхбаатар гээд ардчиллыг Монголд авчрахад салхи татуулан давхиж явсан тэдний түүх үнэхээр эрэмгий.

УИХ-ын гишүүн Э.Бат-Үүлийн хэлснээр ардчиллын партизанууд сайн “туулайчид” аж. Галт тэрэг, цагаан онгоц, “Зил-130” машинаар туулайчилсаар 21 аймагт хүрнэ. Замын зардалгүй байсан учраас туулайчилхаас аргагүй. Зарим үед “Ардчилал” сонин өвөртлөөд л морддог байж. Замын зардалгүй партизанууд “Ардчилал” сонингоо зарж байгаад мөнгө “босгочихно”.  Шуураад л авдаг байсан гэнэ. “Ардчилал” сонин тухайн үед нэг төгрөгийн үнэтэй бол “Үнэн” сонин 85 мөнгөний үнэтэйгээр худалдаалагддаг байжээ.