Төмөр замын Мэргэжлийн сургалт үйлдвэрлэлийн төв, Монгол-Солонгосын
техникийн коллежийн сургалтын үйл ажиллагаатай танилцлаа. Уг арга
хэмжээнд ажил олгогч, үйлдвэрлэгч компаниудын төлөөлөл оролцсон юм. Энэ
үеэр Оюутолгой ХХК-ийн Ерөнхийлөгч бөгөөд Гүйцэтгэх ерөнхий захирал
Камерон Макрей Оюутолгойгоос хэрэгжүүлж байгаа сургалтын хөтөлбөрийн
талаар танилцуулав. Ерөнхий сайд Оюутолгой ХХК-ийн сургалтын хөтөлбөр
үр дүнтэй хэрэгжиж байгааг онцлохын зэрэгцээ үр өгөөж, ач холбогдлыг
тодотгон сайшаав. Мөн үндэсний мэргэжилтэн бэлтгэх, оюутнуудыг ажлын
байраар хангахад идэвхтэй оролцохыг бусад компани, үйлдвэрлэгчдэд хандаж
уриаллаа.
Оюутолгой ХХК Монголын үндэсний мэргэжилтэн бэлтгэх ажилд хувь нэмрээ
оруулах зорилгоор санаачлага гаргаж, сургалтын хөтөлбөр хэрэгжүүлж
эхэлсэн билээ. Уг хөтөлбөрийн дагуу барилга, уул уурхай, хөдөө аж ахуйн
чиглэлээр 3300 залуусыг мэргэжил эзэмшүүлэх сургалтад хамруулж буй.
Тэдний 20 хувь нь төгсөөд Оюутолгойд ажиллах боломжтой. Үлдсэн хүмүүсийн
хувьд ч эзэмшсэн мэргэжлээрээ бусад компанид ажиллах боломж нээлттэй.
Энэхүү тэтгэлэгт сургалтын хөтөлбөр гурван жил хэрэгжих агаад Оюутолгой
ХХК-иас 36 тэрбум төгрөгийн санхүүжилт олгож байгаа юм. Хөтөлбөрийн
хүрээнд мөн МСҮТ-үүдэд тоног төхөөрөмж нийлүүлэх, сургалтын агуулгыг
шинэчлэх, багш нарыг мэргэшүүлэх арга хэмжээ ч багтаж буй.
Үүнээс гадна Оюутолгой ХХК өөрийн мэргэжилтнээ бэлтгэх тэтгэлэгт
сургалтад 140 оюутныг хамруулж, Эрдэнэт, Монгол-Солонгосын техникийн
коллеж, Дарханы МСҮт-д суралцуулж байна. Энэ онд нэмж 166 оюутныг
баяжуулагч оператор, хүнд машин механизмын мэргэжлээр Эрдэнэт, Дархан,
Чойр, Даланзадгадын МСҮТ-д суралцуулах юм.
Монголын хөгжлийн хөтөч гэгдэж буй Оюутолгой ХХК Өмнөговийн иргэд,
гэрээлэгч компаниудын ажиллагсад, сургалтад хамрагдаж байгаа залуус, мөн
нээлттэй зарласан ажлын байрны зарын дагуу ирсэн хүмүүсээс сонгож
ажиллах хүчээ бүрдүүлдэг. Өдгөө барилга угсралтад 5700 гаруй хүн ажиллаж
байна. Энэ онд болон ирэх жил их бүтээн байгуулалт өрнөхтэй
холбоотойгоор барилгын шатанд 16 мянган ажлын байр бий болно. . Харин
уурхай олборлолтоо эхэлсний дараа Оюутолгойд 4000 орчим хүн ажиллах юм.
Улстөрийн тойм