Олон улсын жүдо бөхийн холбооны 2011 оны анхны “Их дуулга”-ын тэмцээн Францын нийслэл Парис хотод үргэлжилж байна. Өчигдөр эрэгтэйчүүдийн 60, 66, 73 кг, эмэгтэйчүүдийн 48, 52, 57, 63 кг-ын жингийн барилдаан болж, аваргууд тодорсон бол өнөөдөр үлдсэн жинд алт, мөнгө, хүрэл медалийн эзэд тодрох учиртай. Парисын татамид өчигдөр зодоглосон манай найман жүдочоос эмэгтэйчүүдийн 52 кг-д М.Бундмаа аваргын алтан медаль хүртэж, эрэгтэйчүүдийн 66 кг-д Х.Цагаанбаатар, С.Мияарагчаа нар тавдугаар байрт шалгарсан билээ.

Харин өнөөдөр Монголын баг тамирчдаас эрэгтэйчүүдийн 81 кг-д О.Ууганбаатар, 90 кг-д Э.Энхбат, -100 кг-д Б.Тэмүүлэн, Н.Түвшинбаяр нар, +100 кг-д Б.Төгөлдөр, харин эмэгтэйчүүдийн -78 кг-ын жинд П.Лхамдэгд нар зодоглоно.

Бээжингийн олимпийн аварга, Монгол Улсын Хөдөлмөрийн баатар, гавьяат тамирчин Н.Түвшинбаяр эхний тойрогт хийлж, хоёрдугаар тойрогт Ази тивийн аварга, Узбекистаны Рамзиддин Саидовтой барилдах бол түүнтэй хамт -100 кг-д хүч сорих Б.Тэмүүлэн эхний тойргийг өнжиж, удаахь тойрогт Африк тивийн хошой хүрэл медальт, Камеруны бөх Фрэнк Моуссиматай эхний барилдаанаа хийхээр болжээ. Эрэгтэйчүүдийн 81 кг-д хамгийн олон буюу 56 жүдоч зодоглох бөгөөд О.Ууганбаатарын тухайд эхний тойрогт хийлж, улмаар Туркийн Серхат Камбуртай барилдах бол 90 кг-ын жинд Э.Энхбат мөн л эхний тойрогт хийлж, хоёрдугаар тойрогт Францын ждоч Людович Гоберттай барилдахаар болжээ. Харин эмэгтэйчүүдийн -78 кг-д хүч үзэх П.Лхамдэгд эхний барилдаанаа дэлхийн чансааны номер долоо, Украйны Марина Пришепатай хийхээр сугалаа таарсан байна.

Хэсгийн барилдаан Монголын цагаар 17.00 цагаас эхэлнэ.