УИХ-ын дарга Д.Дэмбэрэл өчигдөр Ази Номхон далайн парламентын 19 дүгээр чуулганд оролцож байгаа Японы Төлөөлөгчдийн танхимын гишүүн  Акихиса Нагашима тэргүүтэй төлөөлөгчдийг хүлээн авч уулзлаа.  УИХ-ын дарга Д.Дэмбэрэл Монгол Улсын хамгийн том хандивлагчдын нэг болох Япон улсын төлөөлөгчидтэй уулзаж байгаадаа баяртай байгаагаа илэрхийллээ. Тэрбээр, “Бид парламентын ардчилалыг хөгжүүлэхээр 20 жил ажиллаж байна. Монгол оронд зах зээлийн харилцааг төлөвшүүлэх, ардчилалыг хөгжүүлэх үйл явцад хамгийн их туслалцаа үзүүлж байсан орон бол яах аргагүй Япон улс. Хоёр орны харилцаа, хамтын ажиллагааг хөгжүүлэхэд парламентын гишүүдийн оруулсан хувь нэмрийг дурдахгүй байхын аргагүй. Бид хоёр орны харилцааг стратегийн түншлэлийн түвшинд хүргэх том зорилт тавин ажиллаж байна” гэлээ. Мөн тэрбээр орд газруудыг эргэлтэд оруулах зэрэг томоохон ажлуудад Япон улсын зүгээс оруулах хөрөнгө оруулалт арвин байгаасай хэмээн хүсч байгаагаа дуулгасан юм.
Японы Төлөөлөгчдийн танхимын гишүүн  Акихиса Нагашима Япон Монголын харилцааг  стратегийн түншлэлийн түвшинд хүргэхийн төлөө зорьж ажиллах болно гэдгээ илэрхийллээ. Тэрбээр 1992 оноос хойш Японы парламентын тэргүүн Монгол Улсад айлчлаагүй гэдгийг дурдаад ирэх жил тохиох хоёр орны дипломат харилцаа тогтоосны 40 жилийн ойн хүрээнд Японы парламентын дарга болоод Японы Эзэн хааныг Монголд айлчлуулах талаар ажиллах болно хэмээлээ. УИХ-ын дарга Д.Дэмбэрэл Японы парламентын хоёр танхимын даргыг Монголд айлчлахыг урьсан урилга хэвээрээ байгаа гэдгийг дуулгаад Японы Эзэн хаан Монголд айлчлахыг Монголын парламент бүрэн дэмжиж болно гэлээ. Түүнчлэн тэрбээр Японы Эзэн хаан Монголд айлчилбал хоёр орны харилцаанд маш чухал үйл явдал болно гэдгийг дуулгасан юм. УИХ-ын дарга төлөөлөгчдийн бүрэлдэхүүнд багтсан тус улсаас Монгол Улсад суугаа Онц бөгөөд Бүрэн эрхт Элчин сайд Такүо Кидоро хоёр орны парламент хоорондын харилцааг бэхжүүлэхэд маш их үүрэгтэй ажиллаж байгаад талархалтай байдгаа хэллээ.

Уулзалтад Монгол-Японы парламентын бүлгийн дарга  Су.Батболд, УИХ-ын гишүүн Ц.Сэдванчиг, УИХ-ын даргын зөвлөх С.Банзрагч нар байлцлаа хэмээн УИХ-ын Хэвлэл мэдээллийн албанаас дамжууллаа.